Sunday's Vitamin: Ur strengths in Ramadan!

رمضان كريم و كل عام و انت الأسرة بخير و سعادة

الأسابيع اللى فاتت اتكلمنا عن نقط القوة و نقط الضعف.. و أهمية إن أنا و أنت نعرف أولا نقط قوتنا... و نبنى عليها...

و "نقفش" نقط ضعفنا و "نلصمها"... مع المحاولة و المثابرة...

النهاردة هنربط الموضوع ده برمضان...

ازاى يعنى؟!

زى ما عندك نقط قوة و ضعف فى الحياة و فى شغلك... عندك برضه نقط قوة و ضعف فى العبادة و فى علاقتك بربنا...

مش فاهم برضه!!

محمود "سهرتى" بطبيعته... ما عندوش مشكلة انه يسهر نص ساعة زيادة يقوم الليل...

رانيا غاوية طبخ... تحب و تقدر تعمل فطار لذيذ لجيرانها المحتاجين..

شريف غاوى فيس بوك... يعرف ازاى ينشر بيه أذكار و مواعظ جميلة...

سمر "اديها فرطة" و كريمة بطبيعتها... سهل عليها تتبرع و تتصدق كتير...

إنت بقى.. بتحب تعمل ايه؟

فى شهر رمضان (و باقى السنة برضه) ركز على نقط قوتك فى العبادة و فى الخير

تكسب بيها، بإذن الله، حسنات كتير، و تبقى سهلة عليك، و تعملها و أنت مبسوط

وكل عام و انت بخير و نجاح

Sunday's Vitamin: I am not BRILLIANT!

بقى لنا مدة بنتكلم ان من أهم و أسرع طرق التميز فى مجال شغلك، انك تعرف نقاط قوتك و تبنى عليها... و تحدد نقاط ضعفك و تحاول تصلحها على قد ما تقدر...

و اتكلمنا كمان ان كل واحد عنده نقاط قوة و ضعف غير التانى...  و شطارتك انك تحط نفسك فى المجال اللى تظهر فيه نقاط قوتك و مواهبك...

النهاردة فى واحد بيشتكى:

"انا عندى نقطة ضعف... مهارة ناقصة... و عامله لى مشكلة مزمنة فى شغلى...

و مهما اجتهدت و ابدعت فى بقية نواحى العمل... بيفضل الجانب ده مصدر للتقصير و اللوم".

هقول له الحل فى صفة كانت سر لنجاح احد الحاصلين على جايزة نوبل فى الطب...

الأسبانى سانتياجو كاهال، مؤسس علم الاعصاب الحديث... اللى كان فى طفولته طالب فاشل و بتاع مشاكل...

على حد تعبيره... سر نجاحه كان :

“Perseverance; the virtue of the less brilliant”.

"المثابرة، فضيلة الاقل نبوغا"

يعنى ايه؟

انك تحاول و تصبر... و تفشل و يبقى شكلك وحش... و ترجع تحاول كمان و كمان... و تدرب نفسك... و تقع تانى و تقوم... لحد ما تبنى المهارة اللى ناقصة عندك...

كاهال قال ان المثابرة بتجدد خلايا المخ... و تبنى مسارات عصبية جديدة تساعدك على الاتقان فى مهارة انت كنت ضعيف فيها اصلا...

--------------------------------------------

فى النهاية و باختصار...

حدد المهارة الضعيفة اللى عاملة لك مشاكل فى شغلك... و استخدم معاها "فضيلة الأقل نبوغا".

Sunday's Vitamin: Ana we7esh!

اتكلمنا الأسبوع اللى فات ان فى سوق العمل النهاردة كلمة "كويس" ما بقتش كفاية...

و ان الشركات مش هتعين أو هتكبر إلا "المتميز" ... "الرائع"... "الجامد"... مش "الكويس"...

و قلنا ان أبسط طريق للتميز، هو انك تحدد نقط قوتك و مواهبك... و تبنى عليها... مع الإصرار و الإجتهاد..

و انك تعرف أخطر نقط ضعفك... و تحاول تصلحها على قد ما تقدر...

النهاردة عندنا قصة رمزية من الأدب الشعبى الصينى... اقرأها... و رد بتعليق أو على الميل، عن علاقتها بموضوع نقط القوة و الضعف... الخاصة بيك:

كان عند إمرأة صينية مسنة إناءين كبيرين تنقل بهما الماء كل يوم من النهر الى بيتها، تحملهما مربوطين فى عصاة خشبية على كتفيها.

كان أحد الإناءين به شرخ والإناء الآخر سليم. و فى كل مرة تصل المرأة الى بيتها تجد الإناء المشروخ به نصف كمية الماء فقط، بالمقارنة بالاناء الاخر الملىء عن آخره.

وبالطبع، كان الإناء السليم مزهواً بعمله و كفاءته، والإناء المشروخ محتقراً لنفسه لفشله المتكرر و عجزه عن إتمام ما كان يظن أنه متوقع منه.

وفى يوم من الأيام، وبعد سنوات من الضيق و الاحساس بالفشل تكلم الإناء المشروخ مع السيدة و عبر لها عن خجله من نفسه و احساسه بالتقصير و العجز...

فابتسمت له السيدة وقالت "ألم تلاحظ الزهور التي على جانب الطريق من ناحيتك وليست على الجانب الآخر؟"

"أنا أعرف صفاتك جيدا و كذلك الماء الذى يتسرب منك، ولهذا غرست بذور الزهور على طول الطريق من ناحيتك حتى ترويها في طريق العودة من النهر".

"ما لم تكن أنت بهذه الصفات، ما كان لي أن أجد هذا الجمال يزين طريقى و يجمل منزلي".

-------------------------------

مرة تانية... ايه علاقة القصة ده بنقط القوة و نقط الضعف عندك؟

Sunday's Vitamin: Enta Kwayyes?!

"انت كويس يا أحمد، بس ترقيتك هتتأجل شوية!"

"شغلك كويس يا أمل، بس اصبرى شوية على زيادة المرتب!"

 "كنت كويس فى الانترفيو يا شادى، بس احنا اخترنا رامى!"

امتى آخر مرة سمعت حاجة شبه كده؟

و طالما الواحد كويس، ليه بتتأخر ترقيته أو علاوته؟!!

السبب.. ان "كويس" دلوقتى بقت "عادى"... "متوسط"... "مقبول"...

و مع المنافسة الكبيرة فى السوق و حرص الشركات على الابداع و التجديد و الجودة العالية، بقت كل شركة و كل مدير عاوز "المتميز"... "الرائع"... مش "الكويس"

يعنى لو انت كويس فى مجال أو عمل معين.. فده بس البداية... لازم تبنى عليها و تبذل مجهود و تطور نفسك لحد ما تبقى متميز...

طيب ازاى أتميز؟!

بمنتهى البساطة:

1- اعرف أهم نقاط قوتك و مواهبك (المرتبطة بعملك الحالى أو اللى بتدور عليه)... و طور فيها، ادرس، اقرأ، طبق و ارفع مستواك واحدة واحدة...

2- حدد أخطر نقاط ضعفك اللى بتأخر نجاحك أو بتصعبه... و صلحها على قد ما تقدر، بالقراءة و الدراسة و سؤال الزملا الاكثر خبرة...

و ممكن تحل الاختبار الشخصى ده عشان يرشدك مبدئيا لجوانب الذكاء و النبوغ عندك

(اضغط على الصورة)

لو حبيت تحل اختبارات أطول و أعمق ابحث عن

(Multiple intelligences assessment)

Sunday's Vitamin: Throw the SANDBAGS!!

اتكلمنا الأسبوعين اللى فاتوا عن دور البيئة اللى بنعيش فيها فى تشكيل حياتنا و تفكيرنا

البيئة اللى بنكونها جوة بيوتنا... الناس الى بنقضى معاهم حياتنا...

اللى بنقراه و نسمعه و نتفرج عليه... و اللى بنشغل بيه وقتنا...

النهاردة هنبدأ بسؤال غريب شوية..!

ايه دور أكياس الرمل فى طيران المنطاد؟!!

الحقيقة ان دورها بيظهر بس أما تترمى... فيخف وزن المنطاد فيطير أعلى فى السماء

طيب ايه علاقة ده بيك و بيا؟!!

فى كام كيس رمل متقلك و مانعك من الطيران؟

أو معطلك انك توصل للارتفاع اللى انت عاوزه فى شغلك أو حياتك الشخصية؟

أفكار سلبية عن نفسك؟؟

"أنا مش كفء"... "أنا مش قدها"... "أنا خايف"... "احتمال كبير أفشل"... "شكلى هيبقى وحش"...

أصدقاء سوء، أو ناس سلبية أو يائسة أو فاشلة؟؟

عادات مش مفيدة "بتاكل" جزء كبير من وقتك؟؟

كل واحد فينا شايل مجموعة من أكياس الرمل اللى معطلة حياته، و تقدمه و نجاحه...

اعرف أهم و أتقل الأكياس ده... و خد قرار جريء، و ارميها النهاردة...

يالا ما فيش وقت... الدنيا بتجرى... آسف... الدنيا بتطير...

Sunday's Vitamin: Faady shwayah?!!

الأسبوع اللى فات اتكلمنا عن دور البيئة اللى بنعيش فيها

فى تشكيل حياتنا و تفكيرنا

البيئة اللى بنكونها جوة بيوتنا...

الناس الى بنقضى معاهم حياتنا...

اللى بنقراه و نسمعه و نتفرج عليه...

و اللى بنشغل بيه وقتنا...

كل ما كانت البيئة ده ايجابية، كل ما كان ليها أثر طيب على مشاعرك (و مزاجك)، على تفكيرك، و فى تحسين حياتك بشكل عام...

طيب... أحد الأصدقاء سأل...

فيه حاجات كتير بتملا وقتى بعد الشغل، من المشاوير الأسرية، للتليفزيون، لمواقع التواصل الاجتماعى، ساعات ورا ساعات...

ازاى أحدد المفيد ليا فى وسط ده كله، و ازاى أملا وقتى بيه؟

سؤال جميل... و اجابته بتبدأ بأن حياتنا فيها أربع جوانب... لازم نهتم بيهم كلهم علشان نعيش فى توازن و سعادة بإذن الله...

فكر فى كل جانب من حياتك، و ايه اللى ناقصه، و حدد أعمال و عادات لكل أسبوع تشغل بيها وقتك، علشان تصلح و تطور و تنعش الجانب ده...

و تعالى نضرب أمثلة...

1- الجانب الروحى:

علاقتى بربنا ايه اللى ناقصها؟ ايه اللى محتاج أزوده علشان أقوى العلاقة ده؟

قرآن... صلاة جماعة... ذكر... نشاط خيرى... قراءة فى الدين... أو حتى دروس على اليوتيوب... اشغل بيهم جزء من وقتى فى الأسبوع...

محتاج "أروح" عن نفسى شوية؟

اجازة... فسحة... هواية... برنامج باحبه... أحدد لهم مكان وسط الأسبوع...

2- الجانب العاطفى و الاجتماعى:

علاقاتى بالأهل و الأصدقاء ايه اللى ناقصها؟ ايه اللى محتاج أعمله علشان انعش العلاقات ده؟

زيارات... خروجات... مكالمات... معايدات... أو حتى شات...

وقت أطول أقضيه مع الأولاد... نلعب أو نتكلم أو حتى نذاكر...

"شوية رومانسية" أرجع بيها الود مع شريك حياتى...

املأ جزء كمان من وقتك الأسبوعى بالجانب ده...

3- الجانب العقلى:

مهاراتى و ثقافتى ايه اللى ناقصهم؟ ايه اللى محتاج أعمله علشان أنميهم؟

كتب معينة تفيد شغلى أو تنمى ثقافتى أو تطور شخصيتى...

كورس ينمى مهارة أو يزودنى بمعلومات محتاجها...

مقاطع يوتيوب مفيدة أسمعها كل يوم...

سكن أعمال زى ده فى خلال الأسبوع...

4- الجانب الجسدى و المادى:

صحتك و لياقتك ايه اللى ناقصهم؟ و ايه اللى محتاج تعمله علشان تحسنهم؟

بقالك سنة سنانك بتوجعك و مكسل تروح للدكتور؟!

وزنك زايد و ما أخدتش أى خطوة علشان تظبته؟!

محتاج تشترك فى جيم؟!

طيب مادياتك عاملة ايه؟

محتاج تهتم شوية بحساباتك المالية و مصروفاتك؟

محتاج تعطى وقت أكبر لمشروعك الخاص؟

عاوز تشارك فى مشروع جانبى تنمى بيه دخلك؟

شوف اللى هتعمله الأسبوع ده، و كل أسبوع، علشان تهتم بالجانب ده...

---------------------------------------

وقتك هو عمرك...

و اللى بتشغل بيه وقتك هو اللى بإذن الله بيشكل حياتك...

و كمل معايا الحديث الشريف:

" نعمتان مغبون فيهما كثيرٌ من الناس

الـ............ و الـ............."

صدق رسول الله صلى الله عليه و سلم

Sunday's Vitamin: GIGO!!

البيئة اللى بنعيش فيها ليها دور كبير فى تشكيل حياتنا

مش بأقصد هنا البيئة الطبيعية أو الثقافة الاجتماعية...

و لا البلد أو الحى اللى بأسكن فيه...

و لكن أقصد البيئة اللى بنكونها احنا جوة بيوتنا و فى علاقاتنا...

أما أكون بأتفرج كذا ساعة كل يوم على أخبار محبطة أو مقلقة... تفتكر "دماغى" هتبقى عاملة ازاى على المدى الطويل؟!

أما أضيع ساعات غالية كل يوم فى تقليب صفحات النت و التواصل الاجتماعى...

أو أما أقضى جزء كبير من المساء بأتفرج على برامج ترفيهية بس... تفتكر النتيجة هتكون ايه؟!

أما يكون جزء كبير من معارفى اللى بقضى معاهم وقت كبير، متشأمين أو سلبيين أو فاشلين... تفتكر تأثيرهم عليا هيبقى ايه؟!

فيه مبدأ انجليزى معروف بالمعنى ده... اسمه "GIGO"...
اعمل بحث عنه!!

علشان كده، نصيحتنا الأسبوع ده انك تحاول تغير البيئة الفكرية و الاجتماعية اللى بتعيش فيها للأحسن... للأقيم... للأفيد...

و انك تنقى و تنظف البيئة ده من العوامل السلبية اللى بتصغرك أو تحبطتك أو تقلقك...

يعنى.... على أد ما تقدر... :)

و افتكر و كمل معايا الحديث الشريف:

"إِنَّمَا مَثَلُ الجليس الصالحُ والجليسُ السوءِ

كحامِلِ المسك، ونافخِ الكِيْرِ

................................"

صدق رسول الله صلى الله عليه و سلم