Sunday's Vitamin: Your two enemies!!

اتكلمنا الأسبوع اللى فات انك قبل ما تتحرك و تشتغل علشان توصل لأهدافك، لازم تفكر و تقرر تكون الانسان اللى يقدر يحقق الأهداف ده...

الانسان اللى عاداته و صفاته و مهاراته و سلوكياته تناسب أهدافه و طموحاته...

طيب... أنا فكرت و قررت... ايه المشكلة بقى؟

المشكلة فى صوتين جواك، هيحاولوا يمنعوك من التغيير و المغامرة و المخاطرة

علماء النفس بيسموا الأصوات ده "Self-limiting beliefs" أو "القناعات المحددة للذات".

اعتبرهم  أعداء داخليين، لازم تهزمهم عشان تتغير و تتطور للأحسن

و تبقى قادر، بإذن الله، على تحقيق أحلامك

الصوت الأول بيقول... "ما فيش فايدة":

بيقول: ما فيش أمل، ظروفك مش مناسبة، الدنيا صعبة، السكة طويلة، ...

عارفه كويس، مش كده؟!!

أوعى تصدقه...

طيب أعمل ايه مع الصوت ده؟

املأ عقلك و اشغل وقتك بالأفكار الايجابية، عن الأمل، عن الفرص، عن دعم ربنا و توفيقه، عن الخير اللى فى الناس، عن نماذج نجحت و تفوقت رغم الظروف الصعبة.

و ما تشغلش تفكيرك كتير بالسلبيات اللى موجوده حواليك، فى الأخبار، فى المجتمع، و فى "Talk shows"!

بسم الله الرحمن الرحيم

"و لا تيأسوا من روح الله إنه لا ييأس من روح الله إلا القوم الكافرون".

صدق الله العظيم

الصوت التانى بيقول... "مش هقدر":

بيقول: ما عنديش مهارات كافية، ما عنديش خبرة، مش هأعرف، الموضوع صعب عليه، أنا مش قدها، أنا ما أستاهلش، ...

عارفه كويس، مش كده؟!!

أوعى تصدقه...

طيب أعمل ايه معاه؟

اعرف ان حتى لو عندك نقط ضعف فى جوانب معينة، ربنا أكيد أعطاك قصادها مزايا و نقط قوة تعوضها، لأن ربنا ما بيظلمش حد.

دور على مزاياك و مهاراتك، اعرفها كويس، و فكر ازاى تستخدمها عشان توصل لأهدافك.

و فى نفس الوقت، ما تهربش من نقط ضعفك، بس فكر ازاى تصلحها أو تعوضها بنقط القوة اللى عندك.

و درب نفسك... احتك و جرب و حاول... اعمل اللى انت خايف منه... اعمله تانى... مرات و مرات... لحد ما تسكت الصوت ده خالص!

بسم الله الرحمن الرحيم

" إن الله لا يظلم الناس شيئا ولكن الناس أنفسهم يظلمون".

صدق الله العظيم

-----------------------------------------

الأصوات أو القناعات ده غالبا ظهرت عندى و عندك  نتيجة تجارب صعبة مرينا بيها، أو نتيجة لانتقادات عنيفة اتعرضنا لها فى بداياتنا...

لكن زى ما اتعلمنا الأفكار ده و اتغرست جوانا، نقدر نطلعها من عقولنا، و نتعلم و نتعود على غيرها...

لأن استسلامنا ليها هيخلينا فى مكاننا، هيمنعنا من التغيير و التطور، هيمنعنا من تحقيق أفضل أحلامنا...

باختصار شديد

غير قناعاتك... غير حياتك

Sunday's Vitamin: Who do you need to become?!

أكيد عندك أمنيات نفسك تحققها السنة ده

غالبا عندك أهداف عاوز توصلها

احتمال تكون كتبت الأهداف ده و حددتها بوضوح

طيب ايه أول حاجة هتعملها بعد كده؟

هتبدأ تاخد خطوات و تنفذ الخطط عشان توصل لأهدافك؟!

غلط

قبل ما تبدأ تتحرك فى اتجاه أهدافك لازم تفكر

إنت "لازم بتقى مين" عشان تنجح فى الوصول ليها

عندك عادات لازم تسيبها؟ أو عادات جديدة لازم تكتسبها؟

صفات معينة لازم تبقى عندك؟

مهارات محتاج تحسنها و تطورها؟

معلومات لازم تنميها؟

سلوكيات أو طرق للتعامل مع الناس محتاج تكتسبها؟

قبل ما تبدأ رحلتك فى اتجاه أهدافك

فكر كويس، و قرر

انك تبقى الإنسان القادر، بإذن الله، على تحقيقها

و على رأى الكاتب الأمريكى جيم رون:

Sunday's Vitamin: Again, for a self made millionaire!

اتكلمنا المرة اللى فاتت عن تلاتة من سبع عادات قوية للمليونيرات اللى بنوا نفسهم بنفسهم:

“7 Powerful Habits of Self-Made Millionaires”

بناء على مقالة لـ"دانيل على" “Daniel Ally” المليونير الامريكى الشاب

و خبير و محاضر ادارة الأعمال

الأسبوع ده هنكمل الأربع العادات المتبقية:

4- كن نفسك (Be congruent):

طابق أفعالك مع كلامك و وعودك.

طابق أفعالك مع مبادئك و قيمك.

ما تضحيش بقيمك و و مبادئك عشان توصل لأهدافك المادية.

ليه؟!!!!

لأن سمعتك و نزاهتك، على المدى الطويل، أهم بكتير. و لأن راحة البال و الضمير ليها تمن غالى.

و على حد تعبير دانيل:

“There is nothing more valuable than remaining congruent

in your personal and professional lives,

it allows you to mix business with pleasure”.

5- اتخذ قرارات أكتر (Make decisions):

كل ما اتخذت قرارات "صحيحة" أكتر، كل ما أسرعت، بإذن الله، من تقدمك و نجاحك.

و حتى لو بعض قراراتك طلع "غلط"، فأنت بتقصر الوقت اللى بتتعلم فيه من أخطاءك، و بتصحح من اتجاهاتك.

ما تخليش خوفك من النتايج يمنعك من اتخاذ القرارات. احسبها كويس، و توكل على الله، و جرب.

فى واحد بيتخذ قرار واحد كل يوم، و واحد تانى عشرة أو عشرين قرار فى اليوم، وعلى رأى الكاتب:

“The person who makes the most decisions, will win”.

6- إسأل أكتر (Ask questions):

كتير من الناس بيخاف، أو بيحرج، أو حتى بيتكاسل يستفسر عن اللى هو مش عارفه، و بيعتمد على التخمين و الظن.

كل ما سألت أكتر، كل ما عرفت الحقايق أكتر، و كل ما اتحركت فى الاتجاهات الصحيحة، و قللت من أخطائك.

مش عيب إنك تبقى مش عارف كل الاجابات فى عملك، بس على الأقل خليك عارف تسأل مين عشان تكمل معلوماتك.

“To become a millionaire, don’t answer your questions,

but question the answers you have!”

7- كن ماهر و خبير فى مجالك (Become a master):

حدد المهارات الأساسية فى عملك، و اللى نجاحك، بإذن الله، هيعتمد عليها، و طور نفسك فيها بإستمرار.

حدد مناطق الضعف عندك، و اسأل و اقرأ و درب نفسك فيها.

خلى كل يوم أحسن من اللى قبله.

أوعى تقول "ما فيش فايدة"، و اصبر و حاول لحد ماتبقى ماهر و متميز فى مجالك.

------------------------------------------

ده كان ملخص ل:

“7 Powerful Habits of Self-Made Millionaires”

فى المتوسط، الانسان بيكتسب 10 عادات جديدة كل عام،

خليها عادات مفيدة السنة ده!!

و اعرف ان فى البداية، انت اللى بتختار و تصنع عاداتك..

فى النهاية، عاداتك هى اللى بتصنعك!

Sunday's Vitamin: For a self made millionaire!

على مدى أسبوعين، هنتكلم بإذن الله عن سبع عادات قوية للمليونيرات اللى بنوا نفسهم بنفسهم:

“7 Powerful Habits of Self-Made Millionaires”

بناء على مقالة لـ"دانيل على" “Daniel Ally” المليونير الامريكى الشاب

و خبير و محاضر ادارة الأعمال

الأسبوع ده هنبدأ بأول تلات عادات:

1- بسط كلماتك (Simplify your words):

علم نفسك و اتعود توصل رسايلك بأبسط و أوضح الطرق.

اتدرب و مارس ازاى تعبر عن نفسك و عن رأيك.

ما تبالغش فى اختيار الألفاظ و فى "الرغى"، لأن ده بيشتت الناس، و بيضيع الفرص ان رسايلك توصل صح.

اهتم بجودة كلامك، و بالطريقة اللى بتوصله بيها.

2- اترك القديم (Abandon the old):

اعرف طرق تفكيرك و سلوكياتك اللى بتأثر عليك بالسلب، و استبدلها بعادات جديدة ايجابية.

حدد المهارات أو المعلومات اللى نقصاك و اتعلمها.

3- حدد أهداف... لكل يوم (Set goals… daily):

دانيل بيقول إنه كل صباح بيحدد و يكتب أهم أهداف اليوم.

العادة البسيطة ده، بتخليه يبدأ يومه بحماس، و بتدى له "قوة دفع" فى الاتجاهات اللى تساعده ينجح فى حياته.

تحديد أهدافك اليومية بالشكل ده، بيخليك عارف كويس أولوياتك خلال اليوم، و يساعدك تحمى وقتك من المشاغل عديمة الفايدة.

و على حسب تعبير دانيل:

"أما تملا يومك بأنشطة أكثر ربحية، فأنت بتزود رصيدك فى البنك"

“Once you accumulate more profitable activities in your day, you'll add money to the bank”.

--------------------------------------

الأسبوع الجاى ان شاء الله نكمل العادات الأربعة المتبقية من:

“7 Powerful Habits of Self-Made Millionaires”

Sunday's Vitamin: ......... by example!

اتكلمنا فى الأسابيع اللى فاتت عن 6 أفكار مفيدة للقيادة، سواء كنت مدير حاليا أو عاوز تبقى مدير فى المستقبل:

1- اتعلم القيادة و درب نفسك عليها من النهاردة، و باستمرار.

2- آمن بنفسك، و كن على طبيعتك.

3- القيادة الحقيقية إختيار و قرار، مش مجرد ترقية و منصب.

4- القرار السليم مهم للنجاح، و طريقة عرضك للقرار مهمة لوقوف الناس معاك.

5- القائد أو المدير دايما تحت الملاحظة، استغلها لصالحك.

6- اهتم و اعرف "ناسك" كويس.

الأسبوع ده هنتكلم عن فكرة مهمة عن أعضاء فريقك و تأثيرك عليهم

أعضاء فريقك مش بيشتغلوا بجدية على قد طاقتهم...

مش بيتحركوا بسرعة على حسب قدراتهم...

مش ملتزمين بأنظمة العمل على قد ايمانهم بيها...

و لكن جديتهم، و سرعتهم، و التزامهم على حسب اللى بيشوفوه منك... إنت...

لازم تعرف إنك كقائد لمجموعة عمل، إنت اللى بتحدد "ريتم" الشغل، و روحه، و  معايير جودته، مش بكلامك، و لكن بالنموذج اللى بتظهره كل يوم لأعضاء فريقك...

عشان كده، من أهم مبادئ القيادة فى كل العصور هو "القيادة بالقدوة"

"Leading by EXAMPLE"

القيادة الحقيقية مش بكلامك و توجيهاتك، و لكن بأفعالك و مبادئك و عاداتك، و التزامك بيها...

لو فعلا عاوز تأثر فى الناس...

لو فعلا عاوز تغير فريقك أو شركتك أو مجتمعك للأفضل...

ما عندكش اختيار غير انك "تجسد التغيير" اللى عاوز تشوفه فيهم...

و اتفرج على الفيديو القصير ده عن أسلوب "غاندى" للتأثير فى مجتمعه:

Sunday's Vitamin: Again About Leadership (3)

الأسابيع اللى فاتت اتكلمنا عن أربع  أفكار و نصايح فى القيادة، لأى حد فينا نفسه يبقى مدير، أو مديرحاليا و عاوز يكبر فى المناصب فى المستقبل...

الأفكار من كتاب "Leading on the edge"، لمؤلفة استرالية قادت حملة بحثية لمدة سنة فى القارة القطبية الجنوبية...

الأسبوع ده إن شاء الله، هنتكلم عن آخر فكرتين...

1- القائد أو المدير دايما تحت الملاحظة:

- اعرف ان أعضاء فريقك واخدين بالهم كويس من أفعالك و كلامك:

- بتهزر مع مين، بتقعد كتير مع مين، و "بتفوت" لمين.

- بتطبق اللى بتطلبه منهم و لا لأ.

- بتشتغل أد ايه.

- "مودك" عامل ايه.

- خلى بالك من المراقبة ده، و استغلها فى انك توصل رسايل ايجابية لفريقك، عن أمانتك و عدلك، عن جديتك و حماسك، عن ثقتك فى النجاح مهما كانت الظروف صعبة، و غيرها من الرسايل اللى تفيد الشغل.

2- اهتم و إعرف "ناسك" كويس:

- افهم اعضاء فريقك كويس، مش بس شغلهم، و لكن طبايعهم و دوافعهم. و اتصرف مع كل واحد بالطريقة المناسبة، ده هيسهل عليك القيادة كتير.

- كل واحد من أعضاء فريقك بيجيلك الشغل بخبرات و مهارات مختلفة عن غيره. قدر الاختلافات ده، و فكر ازاى تستفيد منها فى مجالات العمل المختلفة.

- خد بالك من الخلافات الصغيرة بين الناس، و اللى ممكن تؤدى لمشاكل كبيرة. و عالجها من بدرى.

- اهتم بالشخص نفسه، اسأله "أخبارك ايه"، و اسمع و تفهم و راعى لو فيه ظروف (حقيقية) مأثره على شغله.