Sunday's Vitamin: Throw the SANDBAGS!!

اتكلمنا الأسبوعين اللى فاتوا عن دور البيئة اللى بنعيش فيها فى تشكيل حياتنا و تفكيرنا

البيئة اللى بنكونها جوة بيوتنا... الناس الى بنقضى معاهم حياتنا...

اللى بنقراه و نسمعه و نتفرج عليه... و اللى بنشغل بيه وقتنا...

النهاردة هنبدأ بسؤال غريب شوية..!

ايه دور أكياس الرمل فى طيران المنطاد؟!!

الحقيقة ان دورها بيظهر بس أما تترمى... فيخف وزن المنطاد فيطير أعلى فى السماء

طيب ايه علاقة ده بيك و بيا؟!!

فى كام كيس رمل متقلك و مانعك من الطيران؟

أو معطلك انك توصل للارتفاع اللى انت عاوزه فى شغلك أو حياتك الشخصية؟

أفكار سلبية عن نفسك؟؟

"أنا مش كفء"... "أنا مش قدها"... "أنا خايف"... "احتمال كبير أفشل"... "شكلى هيبقى وحش"...

أصدقاء سوء، أو ناس سلبية أو يائسة أو فاشلة؟؟

عادات مش مفيدة "بتاكل" جزء كبير من وقتك؟؟

كل واحد فينا شايل مجموعة من أكياس الرمل اللى معطلة حياته، و تقدمه و نجاحه...

اعرف أهم و أتقل الأكياس ده... و خد قرار جريء، و ارميها النهاردة...

يالا ما فيش وقت... الدنيا بتجرى... آسف... الدنيا بتطير...

Sunday's Vitamin: Faady shwayah?!!

الأسبوع اللى فات اتكلمنا عن دور البيئة اللى بنعيش فيها

فى تشكيل حياتنا و تفكيرنا

البيئة اللى بنكونها جوة بيوتنا...

الناس الى بنقضى معاهم حياتنا...

اللى بنقراه و نسمعه و نتفرج عليه...

و اللى بنشغل بيه وقتنا...

كل ما كانت البيئة ده ايجابية، كل ما كان ليها أثر طيب على مشاعرك (و مزاجك)، على تفكيرك، و فى تحسين حياتك بشكل عام...

طيب... أحد الأصدقاء سأل...

فيه حاجات كتير بتملا وقتى بعد الشغل، من المشاوير الأسرية، للتليفزيون، لمواقع التواصل الاجتماعى، ساعات ورا ساعات...

ازاى أحدد المفيد ليا فى وسط ده كله، و ازاى أملا وقتى بيه؟

سؤال جميل... و اجابته بتبدأ بأن حياتنا فيها أربع جوانب... لازم نهتم بيهم كلهم علشان نعيش فى توازن و سعادة بإذن الله...

فكر فى كل جانب من حياتك، و ايه اللى ناقصه، و حدد أعمال و عادات لكل أسبوع تشغل بيها وقتك، علشان تصلح و تطور و تنعش الجانب ده...

و تعالى نضرب أمثلة...

1- الجانب الروحى:

علاقتى بربنا ايه اللى ناقصها؟ ايه اللى محتاج أزوده علشان أقوى العلاقة ده؟

قرآن... صلاة جماعة... ذكر... نشاط خيرى... قراءة فى الدين... أو حتى دروس على اليوتيوب... اشغل بيهم جزء من وقتى فى الأسبوع...

محتاج "أروح" عن نفسى شوية؟

اجازة... فسحة... هواية... برنامج باحبه... أحدد لهم مكان وسط الأسبوع...

2- الجانب العاطفى و الاجتماعى:

علاقاتى بالأهل و الأصدقاء ايه اللى ناقصها؟ ايه اللى محتاج أعمله علشان انعش العلاقات ده؟

زيارات... خروجات... مكالمات... معايدات... أو حتى شات...

وقت أطول أقضيه مع الأولاد... نلعب أو نتكلم أو حتى نذاكر...

"شوية رومانسية" أرجع بيها الود مع شريك حياتى...

املأ جزء كمان من وقتك الأسبوعى بالجانب ده...

3- الجانب العقلى:

مهاراتى و ثقافتى ايه اللى ناقصهم؟ ايه اللى محتاج أعمله علشان أنميهم؟

كتب معينة تفيد شغلى أو تنمى ثقافتى أو تطور شخصيتى...

كورس ينمى مهارة أو يزودنى بمعلومات محتاجها...

مقاطع يوتيوب مفيدة أسمعها كل يوم...

سكن أعمال زى ده فى خلال الأسبوع...

4- الجانب الجسدى و المادى:

صحتك و لياقتك ايه اللى ناقصهم؟ و ايه اللى محتاج تعمله علشان تحسنهم؟

بقالك سنة سنانك بتوجعك و مكسل تروح للدكتور؟!

وزنك زايد و ما أخدتش أى خطوة علشان تظبته؟!

محتاج تشترك فى جيم؟!

طيب مادياتك عاملة ايه؟

محتاج تهتم شوية بحساباتك المالية و مصروفاتك؟

محتاج تعطى وقت أكبر لمشروعك الخاص؟

عاوز تشارك فى مشروع جانبى تنمى بيه دخلك؟

شوف اللى هتعمله الأسبوع ده، و كل أسبوع، علشان تهتم بالجانب ده...

---------------------------------------

وقتك هو عمرك...

و اللى بتشغل بيه وقتك هو اللى بإذن الله بيشكل حياتك...

و كمل معايا الحديث الشريف:

" نعمتان مغبون فيهما كثيرٌ من الناس

الـ............ و الـ............."

صدق رسول الله صلى الله عليه و سلم

Sunday's Vitamin: GIGO!!

البيئة اللى بنعيش فيها ليها دور كبير فى تشكيل حياتنا

مش بأقصد هنا البيئة الطبيعية أو الثقافة الاجتماعية...

و لا البلد أو الحى اللى بأسكن فيه...

و لكن أقصد البيئة اللى بنكونها احنا جوة بيوتنا و فى علاقاتنا...

أما أكون بأتفرج كذا ساعة كل يوم على أخبار محبطة أو مقلقة... تفتكر "دماغى" هتبقى عاملة ازاى على المدى الطويل؟!

أما أضيع ساعات غالية كل يوم فى تقليب صفحات النت و التواصل الاجتماعى...

أو أما أقضى جزء كبير من المساء بأتفرج على برامج ترفيهية بس... تفتكر النتيجة هتكون ايه؟!

أما يكون جزء كبير من معارفى اللى بقضى معاهم وقت كبير، متشأمين أو سلبيين أو فاشلين... تفتكر تأثيرهم عليا هيبقى ايه؟!

فيه مبدأ انجليزى معروف بالمعنى ده... اسمه "GIGO"...
اعمل بحث عنه!!

علشان كده، نصيحتنا الأسبوع ده انك تحاول تغير البيئة الفكرية و الاجتماعية اللى بتعيش فيها للأحسن... للأقيم... للأفيد...

و انك تنقى و تنظف البيئة ده من العوامل السلبية اللى بتصغرك أو تحبطتك أو تقلقك...

يعنى.... على أد ما تقدر... :)

و افتكر و كمل معايا الحديث الشريف:

"إِنَّمَا مَثَلُ الجليس الصالحُ والجليسُ السوءِ

كحامِلِ المسك، ونافخِ الكِيْرِ

................................"

صدق رسول الله صلى الله عليه و سلم

Sunday's Vitamin: How long is ur TO DO list?!

كتير مننا بيكتب كل يوم أو كل أسبوع "To Do list"...

قائمة بالأعمال و المهام اللى عاوز تنجزها خلال ساعات اليوم أو أيام الأسبوع...

مهمة الحقيقة... و بتحميك من نسيان حاجات كتير مهمة قى زحمة الحياة...

نصيحتنا النهاردة بسيطة جدا... عن أهمية "الجدولة"

أما تكتب حاجة في ال "To Do list"... حدد لها معاد... الساعة كذا أو يوم كذا... حسب الوقت المتاح... و حسب ترتيب الأولويات...

هتفرق معاك كتير... نصيحة مجرب!

أولا: هتنجز بإذن الله أكتر.

ثانيا: هتحس بضغط (stress) أقل... لأنك موزع المهام على فترات مختلفة مناسبة ليك... بدل ما "تزحم" اللستة بمهام كتير تحت بعضها...

Sunday's Vitamin: What is ur next BARREL?!

تهت فى الصحرا قبل كده؟!

 

طيب تهت فى حياتك قبل كده؟

فى شغلك.. فى علاقاتاك.. فى تحديد مستقبلك؟ احترت و ما بقتش عارف تكمل فى أى اتجاه!

 

فى فكرة بسيطة عملها الفرنسيين اثناء احتلالهم للجزائر، علشان يعدوا الصحراء الكبرى بدون ما يتوهوا...

فى الصحراء بين الواحة و التانية... كانوا بيحطوا برميل اسود عند مرمى البصر... اما توصل له تلاقى برميل اسود تانى عند مرمى البصر...

و هكذا... برميل ورا برميل فى قلب الصحراء لحد ما توصل للواحة التانية... لحد ما توصل لهدفك...

بنفس الفكرة... و علشان ما تفقدش الطريق فى حياتك و انت بتدور على أحلامك و اهدافك البعيدة... حط "براميل" تعرفك الطريق... تعرفك انك ماشى فى الاتجاه السليم، مهما قامت العواصف من حواليك...

حدد خطوات زمنية.. و أهداف مرحلية... تاخدك واحدة واحدة لأهدافك البعيدة...

حتى لو عطلتك مشاكل و تحديات الحياة ... تفضل عارف الخطوة الجاية فين...

يالا... جاوب بينك و بين نفسك... ايه "البرميل" اللى لازم توصل له الشهر ده...

أو نقول الـ 6 شهور الجايين...

علشان تحقق اهدافك السنة ده؟؟