Sunday's Vitamin: ......... by example!

اتكلمنا فى الأسابيع اللى فاتت عن 6 أفكار مفيدة للقيادة، سواء كنت مدير حاليا أو عاوز تبقى مدير فى المستقبل:

1- اتعلم القيادة و درب نفسك عليها من النهاردة، و باستمرار.

2- آمن بنفسك، و كن على طبيعتك.

3- القيادة الحقيقية إختيار و قرار، مش مجرد ترقية و منصب.

4- القرار السليم مهم للنجاح، و طريقة عرضك للقرار مهمة لوقوف الناس معاك.

5- القائد أو المدير دايما تحت الملاحظة، استغلها لصالحك.

6- اهتم و اعرف "ناسك" كويس.

الأسبوع ده هنتكلم عن فكرة مهمة عن أعضاء فريقك و تأثيرك عليهم

أعضاء فريقك مش بيشتغلوا بجدية على قد طاقتهم...

مش بيتحركوا بسرعة على حسب قدراتهم...

مش ملتزمين بأنظمة العمل على قد ايمانهم بيها...

و لكن جديتهم، و سرعتهم، و التزامهم على حسب اللى بيشوفوه منك... إنت...

لازم تعرف إنك كقائد لمجموعة عمل، إنت اللى بتحدد "ريتم" الشغل، و روحه، و  معايير جودته، مش بكلامك، و لكن بالنموذج اللى بتظهره كل يوم لأعضاء فريقك...

عشان كده، من أهم مبادئ القيادة فى كل العصور هو "القيادة بالقدوة"

"Leading by EXAMPLE"

القيادة الحقيقية مش بكلامك و توجيهاتك، و لكن بأفعالك و مبادئك و عاداتك، و التزامك بيها...

لو فعلا عاوز تأثر فى الناس...

لو فعلا عاوز تغير فريقك أو شركتك أو مجتمعك للأفضل...

ما عندكش اختيار غير انك "تجسد التغيير" اللى عاوز تشوفه فيهم...

و اتفرج على الفيديو القصير ده عن أسلوب "غاندى" للتأثير فى مجتمعه:

Sunday's Vitamin: Again About Leadership (3)

الأسابيع اللى فاتت اتكلمنا عن أربع  أفكار و نصايح فى القيادة، لأى حد فينا نفسه يبقى مدير، أو مديرحاليا و عاوز يكبر فى المناصب فى المستقبل...

الأفكار من كتاب "Leading on the edge"، لمؤلفة استرالية قادت حملة بحثية لمدة سنة فى القارة القطبية الجنوبية...

الأسبوع ده إن شاء الله، هنتكلم عن آخر فكرتين...

1- القائد أو المدير دايما تحت الملاحظة:

- اعرف ان أعضاء فريقك واخدين بالهم كويس من أفعالك و كلامك:

- بتهزر مع مين، بتقعد كتير مع مين، و "بتفوت" لمين.

- بتطبق اللى بتطلبه منهم و لا لأ.

- بتشتغل أد ايه.

- "مودك" عامل ايه.

- خلى بالك من المراقبة ده، و استغلها فى انك توصل رسايل ايجابية لفريقك، عن أمانتك و عدلك، عن جديتك و حماسك، عن ثقتك فى النجاح مهما كانت الظروف صعبة، و غيرها من الرسايل اللى تفيد الشغل.

2- اهتم و إعرف "ناسك" كويس:

- افهم اعضاء فريقك كويس، مش بس شغلهم، و لكن طبايعهم و دوافعهم. و اتصرف مع كل واحد بالطريقة المناسبة، ده هيسهل عليك القيادة كتير.

- كل واحد من أعضاء فريقك بيجيلك الشغل بخبرات و مهارات مختلفة عن غيره. قدر الاختلافات ده، و فكر ازاى تستفيد منها فى مجالات العمل المختلفة.

- خد بالك من الخلافات الصغيرة بين الناس، و اللى ممكن تؤدى لمشاكل كبيرة. و عالجها من بدرى.

- اهتم بالشخص نفسه، اسأله "أخبارك ايه"، و اسمع و تفهم و راعى لو فيه ظروف (حقيقية) مأثره على شغله.

Sunday's Vitamin: More about Leadership (2)

الأسبوع اللى فات اتكلمنا عن فكرتين مفيدتين فى القيادة، لكل واحد فينا نفسه يبقى مدير، أو مديرحاليا و عاوز يكبر فى المناصب فى المستقبل...

الأفكار من كتاب "Leading on the edge"، لمؤلفة استرالية قادت حملة بحثية لمدة سنة فى القارة القطبية الجنوبية...

الأسبوع ده إن شاء الله، هنتكلم عن فكرتين كمان...

1- القيادة الحقيقية إختيار و قرار، مش مجرد ترقية و منصب:

- القيادة تحدياتها كتير، و محتاجة مجهود مستمر. لازم تنوى نية واضحة و تاخد قرارك انك تتحمل كل الصعاب ده، و تثبت لحد ما تنجح مع فريقك.

- توقع المقاومة، من برة و من جوة، ده طبيعى. ما تتضايقش منها، تعامل معاها بحكمة، و اتعلم منها و نمى خبراتك. كل يوم هتكبر و تبقى أحسن، و ثقتك بنفسك هتزيد بإذن الله.

- القيادة رحلة طويلة، ما حدش هيبقى قائد مثالى من أول مرة، دايما في جديد تتعلمه و تطور بيه نفسك. و دايما في أخطاء هتقع فيها و تتعلم منها.

2- القرار السليم مهم للنجاح، و طريقة عرضك للقرار مهمة لوقوف الناس معاك:

- وائم طريقة اتخاذك للقرار حسب الموقف و حسب الأشخاص.

فى معظم الأحيان، هتحتاج تكون ديموقراطى، بس فى بعضها لأ (خاصة أوقات الأزمات).

بس أيا كان القرار، لازم تبيعه و توضح أسبابه للفريق بتاعك.

- وارد ان بعض القرارات ما تعجبش كل الناس، وارد انك تخسر شعبيتك فى مواقف معينة، ده عادى، وضح أسبابك و منطقك، و تفهم و اعترف بضيق أو قلق اللى حواليك.

- أخدت قرار غلط، أو مشيت فى اتجاه مش سليم؟ عادى... خد قرار جديد.