Sunday's Vitamin: HAPPY eid... HAPPY book!

عيد سعيد و كل عام و أنت و الأسرة بخير و نجاح

و كل تمنياتى بإجازة مريحة و موفقة تجدد بيها نشاطتك و قدراتك و تركيزك

مش هنتكلم كتير النهاردة... بس عندنا هدية بسيطة تتسلى بيها فى الاجازة و بعدها...

كتاب مختصر اسمه "Skills for new managers"

14 صفحة بس، بتتكلم عن 6 مبادئ محتاجها كل مدير،

خاصة اللى تولى منصب ادارى قريب أو بيجهز نفسه ليه

(اضغط على الصورة)

عيد سعيد و ادارة سعيدة بإذن الله J

Sunday's Vitamin: Maleesh nefs!

شغلانة دمها تقيل مطلوبة منك...

"تاسك" صعب مستتقل تبدأ فيه...

موضوع محتاج تركيز و بتأجل فيه من فترة...

فاهم قصدى؟ عارف الاحساس ده؟

ده اسمه "Procrastination"

"التسويف" أو "المماطلة"

انك تأجل العمل المهم، عشان صعب و محتاج مجهود، و تشغل نفسك بحاجات تانية سهلة عليك، أقل فى الأهمية...

المماطلة ده ياما ضيعت فرص من ناس، و أخرت نجاح ناس، و اعطت انطباع وحش عن ناس...

طيب حلها ايه؟ ازاى أقاومها؟!

أول حاجة: كسر العمل لأجزاء صغيرة، و ابدأ بجزء واحد منهم، ما تشغلش بالك بالباقى دلوقتى، ابدأ بس... واحدة واحدة...

تانى حاجة: استخدم طريقة أنا جربتها و نجحت معايا...

طريقة "عداد الوقت" أو "stop watch"...

قرر انك تبدأ و تركز 25 دقيقة فى العمل... 25 دقيقة بس، بعدها ابقى اعمل اللى انت عاوزه يا سيدى... و شغل الساعة...

ايه اللى بيحصل هنا؟

انت بتضحك على الجزء فى عقلك اللى مستتقل العمل، و بتقنعه ان الموضوع بسيط... عشان تقدر على مقاومته...

 طيب ايه اللى هيحصل بعد كده؟

هتخلص الـ25 دقيقة، و هتلاقى نفسك "سخنت" و مش عاوز توقف العمل... و هتمد الوقت لفترة أطول... لحد ما تخلصه...

جربها...

و على رأى الفيلسوف الألمانى "جوته":

"فقط ابدأ و سيحمى عقلك، استمر و سيكتمل العمل"

Sunday's Vitamin: Who is ur COACH?!

الموسم الكروى السنة ده فى اخر ايامه...

و هيبدأ موسم انتقال المدربين بين الاندية و المنتخبات...

كل فريق بيدور و بيسعى ورا احسن مدرب مناسب له...

زيدان أو مورينهو أو جوارديولا...

يول أو ايهاب أو حسام...

ليه؟

لأن زى ما لاعبى الفريق مهمين... مهم بردو مين اللى بيدربهم و يوجههم و يخطط لهم...

و فيه مدربين رفعوا فرقهم للسما، و مدربين نزلوا فرقهم الأرض...

انت بقى... مين مدربك؟!

مين اللى بتقرأ أو تتفرج أو تسمع له باستمرار؟

مين اللى أفكاره و نصايحه بتأثر و تشكل حياتك؟

مين قدوتك؟

ممثل أو مغنية؟

كاتب أو مفكرة؟

نبى أو داعية؟

حد ناجح و خبير فى مجالك؟

أوعى تنسى تنقى مدربينك كويس

هيفرقوا كتير أوى فى حياتك