Sunday's Vitamin: Rayya7 balak!!

بتفكر كتير ازاى هتجيلك فرص للعمل أو للترقى فى المستقبل؟

مش عارف ازاى هتلاقى وظيفة فى الشركة الفلانية؟!

طريقك المهنى طويل و المنافسة شديدة؟!

محتار ازاى هتجيب زباين لمشروعك؟ 

فيه أسئلة كتير زى ده بتقلقنا و تتعبنا...

بس الحل جه على لسان هدهد سليمان (ص)!

بسم الله الرحمن الرحيم

"ألا يسجدوا لله الذى

يخرج الخبء

فى السماوات و الأرض"

صدق الله العظيم

الخبء هو كل ما لاتراه عينك الآن من فرص أو رزق أو وظايف أو صفقات أو ....

يبقى سواء رزقك و فرصك فى السما أو فى الأرض، فى بلدك أو فى غيرها، إطمن، ربنا قادر و كفيل انه يجيب لك رزقك أو يوصلك ليه...

كل المطلوب منك انك تعمل اللى عليك، تخطط، تجتهد، و تسيب الباقى على الله...

و ريح بالك

Sunday's Vitamin: On the road or on the mirror?!

سمعت قريب عن حادثة خطيرة حصلت بين سيارة عادية و أتوبيس مدرسة...

فى الوقت اللى كان فيه الاسعاف بيحاول يعالج سائقة السيارة، سألوها عن سبب الحادثة، فقالت لهم انها كانت بتبص على مراية الرؤية الخلفية و ما شافتش الأتوبيس أما ظهر قدامها...

طيب...

كل واحد فينا عنده ذكريات و شخصيات فى ماضيه واخده جزء كبير من تفكيره لحد النهاردة... و ممكن تبقى شاغلاه عن رؤية الحاضر بنعمه أو المستقبل بفرصه... زى موضوع المراية الخلفية كده...

الماضى لو فيه مشاكل و ذكريات مؤلمة...

خليه معلم لينا و موعظة و خبرة...

مش مصدر للندم المستمر و الحيرة و الأعذار... سجن يعنى...

و لو ماضيك فيه نجاحات و انتصارات...

خليها مصدر ثقة و حافز و أمل ليك...

مش مصدر لأحلام اليقظة و الهروب من الحاضر...

يبقى النهاردة... حدد ذكريات الماضى اللى بتأثر فى الحاضر الخاص بيك...

و حرر نفسك من قيودها و دوامتها...

لأن أيا كان ماضيك... مستقبلك هيعتمد، بإذن الله، على اللى هتعمله النهاردة... 

ما تطولش النظر على مرايتك... و خلى عنيك على الطريق و الفرص قدامك...

و انزل لساحة الحياة و العب بحرية و حماس...

و على رأى كاتب الادارة الأمريكى جيم رون "Jim Rohn":

“Have your past be a school master, not a club”

Sunday's Vitamin: What's ur 4 minute mile?!

حكينا الأسبوع اللى فات قصة "روجر بانستر" الانجليزى، اللى كان أول انسان يجرى مسافة ميل فى أقل من أربع دقائق...

رابط الجرعة اللى فاتت:

و قلنا ان الغريب ان الرقم ده اتكسر كتير بعد كده، و بقى شىء طبيعى النهاردة بعد ما كان مستحيل لسنين طويلة قبل "بانستر".

و ختمنا كلامنا بسؤال مهم...

ازاى ده حصل؟!!

ازاى شىء كان مستحيل، ما حدش قادر يوصل له، مرة واحدة بقى فى متناول كتير من الناس؟!

فى زملا تجاوبوا و ردوا على السؤال... و قالوا:

- بعد ما واحد كسر حاجز القمة، سقف المنافسة و الارادة ارتفع لبقية العدائين...

- الفرق هو "الاعتقاد" بإن شىء معين ممكن و مش مستحيل، و ده فى حد ذاته شجع الناس للوصول لمستويات أعلى...

- طالما "واحد وصل"... يبقى "أنا كمان ممكن أوصل"...

- أما تؤمن انك تقدر تحقق هدف معين، و تتحرك بجدية فى اتجاهه، عقلك و قواك و ارادتك كلها هتتوحد عشان تساعدك على الوصول ليه...

طيب الكلام ده هيفيدك و يفيدنى بإيه؟!!

اللى انت مقتنع إنك ممكن أو مش ممكن تحققه فى مستقبلك،

هو اللى، بإذن الله، بيحصل

لو إنت شايف ان حلمك مستحيل،

عمرك ما هتاخد الخطوات المطلوبة عشان توصله

ايمانك ان حلمك و هدفك قابل للتحقيق،

هو اللى بيشحن تفكيرك و مجهودك و عزيمتك لحد ما تحققه

هختم كلامى معاك الأسبوع ده، بسؤال تانى...

ايه حاجز الأربع دقايق فى حياتك؟؟!

ايه اللى انت شايفه مستحيل لحد النهاردة؟

غير قناعاتك... تغير حياتك بإذن الله

بسم الله الرحمن الرحيم

"فما ظنكم برب العالمين"

صدق الله العظيم

Sunday's Vitamin: The 4 minute mile story!

اتكلمنا قبل العيد ان ربنا أكيد أعطى كل واحد فينا مواهب مميزة

و مهمتك انك تكتشف المواهب ده،

و تنميها و تمارس و تجرب،

و تفشل و تجرب تانى، و تثابر أيام و سنين،

لحد ما تبقى "عالمى" فى مجالك

لكن هييجى واحد يقول: " يا عم أنا أخرى كده، عالمى ايه بس؟!"

علشان كده هحكيلك النهاردة قصة لطيفة

لحد نص القرن اللى فات، كان كتير من خبراء الرياضة و خبراء الطب فاكرين ان الانسان بقدراته الجسدية ما يقدرش يجرى مسافة ميل فى أقل من أربع دقايق... شايفين ان ده مستحيل...

و الظن ده كان سائد من عقود طويلة...

لحد ما جه واحد انجليزى اسمه ’روجر بانستر’ فى سنة 1954 و كسر حاجز الأربع دقايق ده بجزء من الثانية (3 دقايق و 59.4 ثانية)...

الغريب ان بعدها بـ 46 يوم بس، فيه عداء تانى كسر رقم بانستر!!

و اتكسر الرقم ده كتير بعد كده لحد ما بقى شئ عادى و أساسى النهاردة للعدائين المحترفين!!!!

طيب ايه اللى حصل؟؟

و ليه مرة واحدة الرقم بقى متاح للناس

بعد ما كان مستحيل عشرات السنين قبل كده؟؟ 

فكر فى الاجابة...

و رد بيها تعليق أو على الميل...

و هنتناقش فيها بإذن الله المرة الجاية...

Sunday's Vitamin: Just RELAX!!

كل عام و إنت بخير بعيد الأضحى المبارك

و كل عام و إنت فى نجاح و سعادة بإذن الله

و طلبى منك فى الأجازة الحلوة ده انك

RELAX

تسترخى على قد ما تقدر علشان تجدد نشاطك

بس التجديد الحقيقى... و عشان فعلا يكون له أثر واضح معاك، لازم يغطى أربع جوانب فى حياتك...

1- الجانب الجسدى:

يعنى إيه؟؟!

يعنى نوم، راحة، أكل صحى، تجربة مطعم و لا مطعمين جداد، لبس جديد، شوية رياضة، ...

2- الجانب العاطفى:

ازاى يعنى؟!!

3- الجانب العقلى:

يعنى قراءة فى مواضيع لطيفة جديدة، ممكن مراجعة سريعة لكتاب حلو عندك، تسمع و انت مسافر تسجيلات مفيدة، ...

4- الجانب الروحى:

عاوز أمثلة؟!

بالاهتمام بالأربع جوانب ده، هتكون فعلا استغليت الاجازة عشان تجدد نشاطك و حياتك و علاقاتك...

و تبقى جاهز بإذن الله علشان تكمل مشوارك الجميل لتحقيق أهدافك السنة ده...

 

ياللا... نتقابل بعد العيد ان شاء الله

Sunday's Vitamin: 4th year of Vitamins!!

كل عام وأنت بخير على مرور ثلاث أعوام من "Sunday’s Vitamin"

و بداية العام الرابع من جرعات الفيتامينات

 

بالمناسبة ده، أحب أقدم لك هدية بسيطة

كتاب مجمع لأفكار و مبادئ كتير فى القيادة

“How to Lead?”

حمله و اقرأه على مهلك

و حاول تطبق بعض أفكاره

https://drive.google.com/file/d/0B7kUpuZBChhDUUZscmJCY0FmTEk/view?usp=sharing

Sunday's Vitamin: The SWAN effect!

اتكلمنا فى "الفيتامين" اللى فات إن تقدم الانسان و ترقيه بيبقى غالبا فى صورة تطور تدريجى "Evolution" مش تغيير مفاجئ "Revolution"...

يعنى كل مهارة بنميها، كل علم بكتسبه، كل سلوك بغيره... محتاج تطبيق و صبر و تدريب مرات و مرات... أيام ورا أيام... عشان فعلا يكون له أثر فى نجاح الواحد و تميزه على المدى الطويل...

طيب "إشمعنا" بعض الناس مولودين موهوبين و متميزين؟!

اشمعنا ميسى متألق كده من أول يوم؟!

ليه زويل كان عبقرى فيزيا من يومه؟!

إزاى نجيب محفوظ و أنيس منصور الأدب "بينقط" منهم من البداية؟!

ده إسمه "تأثير البجعة"

"Swan effect"

بجعة ايه بالضبط؟!!

رغم وزن البجعة و حجمها، الا انها بتعوم بإنسابية و سرعة عالية، و بنستغرب من سهولة حركتها و خفتها...

لإننا مش شايفين المجهود الكبير و المتواصل اللى بتبذله برجليها تحت الميه...

و ده مثل لأى متميز أو مبدع فى مجاله... بنشوفه و نستغرب إزاى وصل للمستوى ده؟!

لأننا مش شايفين المجهود و الصبر و السهر اللى بيبذله كل يوم عشان يوصل و يحافظ على مستواه...

الخلاصة...

ربنا أعطاك مواهب مميزة زى ما أعطى غيرك...

زى ميسى و زويل و محفوظ...

هم اكتشفوا مواهبهم و نموها و صبروا عليها...

انت بقى هتعمل إيه؟؟!!

بسم الله الرحمن الرحيم

"من عمل صالحا فلنفسه و من أساء فعليها"

صدق الله العظيم