Sunday's Vitamin: The 4 minute mile story!

اتكلمنا قبل العيد ان ربنا أكيد أعطى كل واحد فينا مواهب مميزة

و مهمتك انك تكتشف المواهب ده،

و تنميها و تمارس و تجرب،

و تفشل و تجرب تانى، و تثابر أيام و سنين،

لحد ما تبقى "عالمى" فى مجالك

لكن هييجى واحد يقول: " يا عم أنا أخرى كده، عالمى ايه بس؟!"

علشان كده هحكيلك النهاردة قصة لطيفة

لحد نص القرن اللى فات، كان كتير من خبراء الرياضة و خبراء الطب فاكرين ان الانسان بقدراته الجسدية ما يقدرش يجرى مسافة ميل فى أقل من أربع دقايق... شايفين ان ده مستحيل...

و الظن ده كان سائد من عقود طويلة...

لحد ما جه واحد انجليزى اسمه ’روجر بانستر’ فى سنة 1954 و كسر حاجز الأربع دقايق ده بجزء من الثانية (3 دقايق و 59.4 ثانية)...

الغريب ان بعدها بـ 46 يوم بس، فيه عداء تانى كسر رقم بانستر!!

و اتكسر الرقم ده كتير بعد كده لحد ما بقى شئ عادى و أساسى النهاردة للعدائين المحترفين!!!!

طيب ايه اللى حصل؟؟

و ليه مرة واحدة الرقم بقى متاح للناس

بعد ما كان مستحيل عشرات السنين قبل كده؟؟ 

فكر فى الاجابة...

و رد بيها تعليق أو على الميل...

و هنتناقش فيها بإذن الله المرة الجاية...

Sunday's Vitamin: Just RELAX!!

كل عام و إنت بخير بعيد الأضحى المبارك

و كل عام و إنت فى نجاح و سعادة بإذن الله

و طلبى منك فى الأجازة الحلوة ده انك

RELAX

تسترخى على قد ما تقدر علشان تجدد نشاطك

بس التجديد الحقيقى... و عشان فعلا يكون له أثر واضح معاك، لازم يغطى أربع جوانب فى حياتك...

1- الجانب الجسدى:

يعنى إيه؟؟!

يعنى نوم، راحة، أكل صحى، تجربة مطعم و لا مطعمين جداد، لبس جديد، شوية رياضة، ...

2- الجانب العاطفى:

ازاى يعنى؟!!

3- الجانب العقلى:

يعنى قراءة فى مواضيع لطيفة جديدة، ممكن مراجعة سريعة لكتاب حلو عندك، تسمع و انت مسافر تسجيلات مفيدة، ...

4- الجانب الروحى:

عاوز أمثلة؟!

بالاهتمام بالأربع جوانب ده، هتكون فعلا استغليت الاجازة عشان تجدد نشاطك و حياتك و علاقاتك...

و تبقى جاهز بإذن الله علشان تكمل مشوارك الجميل لتحقيق أهدافك السنة ده...

 

ياللا... نتقابل بعد العيد ان شاء الله

Sunday's Vitamin: 4th year of Vitamins!!

كل عام وأنت بخير على مرور ثلاث أعوام من "Sunday’s Vitamin"

و بداية العام الرابع من جرعات الفيتامينات

 

بالمناسبة ده، أحب أقدم لك هدية بسيطة

كتاب مجمع لأفكار و مبادئ كتير فى القيادة

“How to Lead?”

حمله و اقرأه على مهلك

و حاول تطبق بعض أفكاره

https://drive.google.com/file/d/0B7kUpuZBChhDUUZscmJCY0FmTEk/view?usp=sharing

Sunday's Vitamin: The SWAN effect!

اتكلمنا فى "الفيتامين" اللى فات إن تقدم الانسان و ترقيه بيبقى غالبا فى صورة تطور تدريجى "Evolution" مش تغيير مفاجئ "Revolution"...

يعنى كل مهارة بنميها، كل علم بكتسبه، كل سلوك بغيره... محتاج تطبيق و صبر و تدريب مرات و مرات... أيام ورا أيام... عشان فعلا يكون له أثر فى نجاح الواحد و تميزه على المدى الطويل...

طيب "إشمعنا" بعض الناس مولودين موهوبين و متميزين؟!

اشمعنا ميسى متألق كده من أول يوم؟!

ليه زويل كان عبقرى فيزيا من يومه؟!

إزاى نجيب محفوظ و أنيس منصور الأدب "بينقط" منهم من البداية؟!

ده إسمه "تأثير البجعة"

"Swan effect"

بجعة ايه بالضبط؟!!

رغم وزن البجعة و حجمها، الا انها بتعوم بإنسابية و سرعة عالية، و بنستغرب من سهولة حركتها و خفتها...

لإننا مش شايفين المجهود الكبير و المتواصل اللى بتبذله برجليها تحت الميه...

و ده مثل لأى متميز أو مبدع فى مجاله... بنشوفه و نستغرب إزاى وصل للمستوى ده؟!

لأننا مش شايفين المجهود و الصبر و السهر اللى بيبذله كل يوم عشان يوصل و يحافظ على مستواه...

الخلاصة...

ربنا أعطاك مواهب مميزة زى ما أعطى غيرك...

زى ميسى و زويل و محفوظ...

هم اكتشفوا مواهبهم و نموها و صبروا عليها...

انت بقى هتعمل إيه؟؟!!

بسم الله الرحمن الرحيم

"من عمل صالحا فلنفسه و من أساء فعليها"

صدق الله العظيم

Sunday's Vitamin: Revolution or Evolution?!

اتكلمنا الأسبوع اللى فات إن اذا ربنا منحك مواهب معينة.. فدورك انك تنمى و 'تصقل' المواهب ده بالتدريب و الممارسة المستمرة... لحد ما تبقى 'عظيم و متميز' فى مجالك...

المرة ده هنفترض انك قرأت كتاب أو حضرت دورة عشان تنمى مواهبك...

ايه اللى بيحصل فى الغالب بعد كده؟؟

رد عليا بأمانة... ايه اللى حصل؟

فى الغالب بيبقى التغيير العملى بسيط جدا...

طيب ليه؟

عشان كتير مننا مستنى التغيير يكون مفاجئ و ثورى (revolution)

مع ان تقدم الانسان و ترقيه بيبقى فى معظم الأحيان تطور تدريجى (evolution)

و نتيجة ان احنا ما بنلاقيش التغيير الثورى ده بعد الدورة أو الكتاب... بنزهق بسرعة و نقول 'ما جابش همه'... و بالتالى بنضيع فرصة الاستفادة الحقيقية من اللى اتعلمناه...

نصيحتنا الأسبوع ده... انك تعرف ان تنمية مواهبك و تطويرها 'مش بالساهل'...

محتاجة أولا انك تحدد هتركز على أى مواهب بالضبط...

و بعدين تطبيق... و صبر... و ممارسة... أيام ورا أيام... لحد ما توصل بيها لمستوى يخليك فعلا متميز...

و اعرف ان أى عالمى فى مجاله... رياضة.. أدب... علم... فن... ما وصلش للمستوى المتميز ده الا بعد سنين من التدريب و الممارسة و ال'evolution'...

و افتكر الآية اللى بتشجعنا على أهمية تطبيق العلم عشان نرسخه جوانا و نستفيد منه:

بسم الله الرحمن الرحيم

"و لو أنهم فعلوا ما يوعظون به

لكان خيرا لهم و أشد تثبيتا *

و إذا لآتيناهم من لدنا أجرا عظيما"

صدق الله العظيم

Sunday's Vitamin: YOU got talent?!!

كل يوم بنشوف فى برامج التليفزيون أو على يوتيوب شباب كتير عندهم مواهب و مهارات رائعة..

فى الرياضة، فى الفن، فى البحث العلمى، فى الأدب، أو حتى فى الاستعراض..

و انت كمان عندك مواهب جميلة ربنا أعطاها لك..

لكن كام من الشباب الموهوب ده بينجح و يكبر و يشتهر على المدى الطويل، و يبقى ليه أثر واضح فى مجتمعه؟!!

الحقيقة النسبة قليلة أوى!!

طيب ليه؟؟؟!

لأن الموهبة لوحدها ما تعملش نجاح و انجاز طويل الأمد..

اذا كانت الموهبة هدية من ربنا..

فأنت لازم تخلطها بخبرة و مجهود و ممارسة من عندك.. أيام و سنين متواصلة ..

عشان تنجح و تتميز فى المستقبل..

مايكل جوردان، اترفض فى شبابه من مدرب فريق كرة السلة فى مدرسته الثانوية..

بس قضى عمره بعد كده فى التدريب و الممارسة لتنمية مواهبه، و بناء مهاراته، و حافظ على المنهج ده سنين طويلة..

و يوم ورا يوم، سنة ورا سنة كان بيكبر و يتميز، لحد ما بقى أسطورة فى مجاله..

هاختم كلامى معاك الأسبوع ده بنصيحة بسيطة..

حدد ايه المواهب أو المهارات اللى انت عاوز تبقى "عظيم و متميز" فيها..

و حدد انت لازم تعمل ايه كل يوم أو كل أسبوع عشان تنمى و تكبر المواهب ده... اثبت و خلى عندك إصرار... و هتشوف و تعاين التقدم التدريجى بإذن الله..

و اعرف ان الوقت كده كده بيعدى،

بس رياح الزمن ممكن تعمل تآكل فى مواهبك، أو تعمل "صقل" ليها،

على حسب انت بتقضى وقتك و تفنى عمرك فى ايه

Sunday's Vitamin: A RIVER or a SWAMP?!

كل عام وأنت بخير بشهر رمضان المبارك

أعاده الله عليك بالنجاح و التقدم و العافية

فى حياتنا مع الناس و فى وسط مجتمعاتنا،

فى ناس بتعيش زى النهر و ناس زى المستنقع!!!

النهر رمز للحياة، للعطاء، للتغيير، للتقدم، لتخطى العقبات و الوصول للغايات.

عشان كده غنى بالحياة و بالطاقة، مصدر للمياه و للتربة الخصبة، و على ضفافه بيعيش و يستقر الناس.

أما المستنقع فهو رمز للركود و الاستكانة.

عشان كده ماؤه غير صالح للاستخدام، غنى بالعلل و الأمراض، و  الناس بتبعد عنه و تهجره.

رغم ان الاتنين من نفس العنصر، الا ان الفرق الكبير ده بسبب حاجتين:

1- مدخلات مستمرة و متجددة.

2- مخرجات مفيدة.

فكر بقى مرة تانية، انت بتعيش حياتك فى وسط مجتمعك، زى النهر و لا زى المستنقع؟!!!

1- بتتعلم باستمرار و تدور على الجديد و تطبقه؟

بتطور من نفسك و تحسن مهاراتك و سلوكياتك؟

و لا عايش بنفس الطريقة و نفس السلوكيات من سنين طويلة؟

2- بتفيد اللى حواليك بخبراتك و باللى اتعلمته؟

بتنصح ده، و تطور ده، و توجه ده؟

و لا قافل على معلوماتك و مش عاوز تفيد حد بيها؟

أوعى تفتكر ان العطاء ده ممكن يخسرك أو يخلى غيرك يسبقك...

بالعكس، العطاء ده بيرسخ العلم جواك، بيفكرك باللى انت اتعلمته، و بيفتح عقلك و يحفزك لاكتساب علم و أفكار جديدة. و يعلى قيمتك فى وسط الناس.

خليك رمز للحياة و التدفق، فى كل نواحى حياتك

خاصة و احنا فى شهر الجود و الكرم

و افتكر سيرة النبى عليه الصلاة و السلام:

"كَانَ رَسُولُ اللَّهِ صَلَّى اللَّهُ عَلَيْهِ وَسَلَّمَ أَجْوَدَ النَّاسِ بِالْخَيْرِ

وَكَانَ أَجْوَدَ مَا يَكُونُ فِي شَهْرِ رَمَضَانَ".