Sunday's Vitamin: Nadman?!!

ندمان على حاجات عملتها فى الماضى؟

عندك أخطاء ارتكبتها فى حياتك العملية أو الشخصية و شايف انك بتدفع تمنها دلوقتى؟

حاسس ان فشلك زمان مأثر عليك لحد النهاردة؟

شايف ان مستقبلك هيتأثر بقرارات غلط أخدتها قبل كده؟

 

سيبك من كل ده

و اعرف ان طالما لسة فى عمرك بـقية

يــبــقى أيــا كانــت ســــنـك أو ظـــروفــك أو مـــوقــعــك

فـــرصـــــك مــــازالـــــت موجــــــودة

و ربنا بإيـده يــصلح لك طريــقك و يهيـألك فـرص جـديدة

طــول ما عنـدك النيــة انــك تـحاول و تــجتـهد و تـنــجح

 

 

و اسمع القصة القصيرة ده، من محاضر الادارة الامريكى دارين هاردى،عن نجاح واحد كلنا عارفينه، بعد سنوات طويلة من الظروف الصعبة و الفشل المتكرر:

Sunday's Vitamin: What was ENOUGH is no more ENOUGH!

كام ايميل بيجيلك كل يوم؟

كام بوست بيظهر لك على الفيس أو الواتس؟

كام اعلان بتشوفه و كام منتج بيحاول يشد انتباهك؟

كام واحد بتقابله أو بيطلب منك حاجة كل يوم؟

 كام طلب أو تقرير بتقدمه لمديرك؟

 و لو انت مدير، كام حاجة بتطلبها من موظفيك كل يوم؟

تفتكر فى وسط الزحام ده كله،

مين اللى بنفتكره أكتر؟

مين اللى بيعلم فى شغله و مع مديره أكتر؟

مين اللى بيأثر فيك أكتر؟

البوست العادى... و لا البوست اللى بيحرك حاجة جواك؟

الإعلان التقليدى... و لا الى بيقدم فكرة جديدة؟

 الى بيسلم عليك سلام روتينى... و لا الى مهتم بيك و بأحوالك؟

الى بيقدم عمل تقليدى... و لا الى بيبتكر كل يوم فى عمله؟

الى بيعمل الى عليه و خلاص... و لا الى "بيتوصى" اكتر و يحط لمسته الشخصية؟

عاوز تتميز و تعلم مع الناس؟

نفسك الى حواليك يفتكروك و يعرفوا شغلك؟

لازم اكتر، لازم تجدد،

لازم تحط لمستك الشخصية و تبتكر فى الى إنت بتعمله و تقدمه للناس

كل يوم

Sunday's Vitamin: Osbor showayyah!!

شوفت قبل كده طفل صغير متأخر فى الكلام؟

شوفت ازاى أهله بيكلموه و يعلموه لشهور طويلة من غير ما ينطق؟!

طيب شوفت أما مرة واحدة، و بعد صبر طويل، اتكلم "لبلب" كأنه بيتكلم من زمان؟!

ده اسمه "التأثير المركب" أو "Compound Effect"

انك تبذل مجهود فى مجال معين لفترة طويلة بدون أثر..

و بعد صبر و اصرار، تظهر مرة واحدة أفضل النتايج اللى انت مستنيها..

طيب ايه فايدة الكلام ده دلوقتى؟!

عشان نفتكر أنا و أنت كام مرة:

لعبنا رياضة أو اشتركنا فى جيم، لكام يوم أو كام أسبوع، و أما ما ظهرتش النتايج بسرعة بطلنا..

ظبطنا أكلنا و مشينا على ريجيم صحى، و أما وزننا ما قلش، زهقنا و رجعنا لنظامنا القديم..

قرأنا فى مجال معين يفيد شغلنا، و أما حسينا ان ما فيش فرق واضح، و قفنا قراءة و قلنا الموضوع مش جايب همه..

حاولنا نواظب على عبادة معينة، و أما ما حسيناش بأثر روحى أو نفسى، رجعنا تانى زى الأول..

فى كل المرات ده، لو كنا صبرنا شوية كمان،

كنا شوفنا "التأثير المركب" و أخدنا أحسن النتايج اللى كنا بندور عليها..

يبقى ببساطة كده، حدد أهم أهدافك للعام ده، و حدد الأفعال أو العادات اللى لو واظبت عليها، توصلك باذن الله لأهدافك..

و قرر.. انك تصبر لحد ما تشوف "التأثير المركب" اللى نفسك فيه..

و افتكر الآية الجميلة:

بسم الله الرحمن الرحيم

يأيها الذين آمنوا

اصبروا وصابروا ورابطوا

واتقوا الله لعلكم

تــفـــلـــحـــــــون

صدق الله العظيم

Sunday's Vitamin: I have no opportunities!

عندك آمال و أحلام كبيرة نفسك تحققها؟

شايف ان امكانياتك أو خبراتك محدودة؟

حاسس ان الموارد المتاحة بسيطة؟

فى كلمة جميلة بتقول:

 

"احلم كبيرا، ابدأ صغيرا، تحرك الآن"

طيب هتقول لى ان الدنيا صعبة و المنافسة شديدة و فرص النجاح قليلة

هقولك اسمع القصة البسيطة الجميلة ده من بسمة أمل لعمرو خالد:

Sunday's Vitamin: Take care of this!

الوقت عنصر غريب فى حياتنا

 

انت ممكن تخسر بعض المال فى مشروع معين، لكن ممكن برضه تعوضه تانى..

ممكن تحوش مبلغ محدد لفترة هتكون محتاجه فيها..

ممكن فى اى وقت تعرف رصيدك بدقة فى البنك..

لكن بالنسبة للوقت..

ما فيش حد فينا يعرف رصيده المتبقى أد ايه!!

ما حدش يقدر يحوش و لا ثانية عشان يسخدمها فى المستقبل!!

الوقت اللى بتخسره، مهما عملت ما تقدرش ترجعه تانى!!

يبقى خد بالك من وقتك

خد بالك من أيامك و أسابيعك

خد بالك بتستفيد منها ازاى او بتعمل فيها ايه

فيه ناس ضيعت سنوات من عمرها بدون فايدة أو بدون انجاز أو بدون تطوير لنفسها..

كتير مننا بيرجع من شغله كل يوم، و يسيب ساعات المساء تفلت من ايده بدون فايدة، أو يضيع أجازاته الأسبوعية فى الـ "ولا حاجة"!

عشان كده لازم تبقى عارف و محدد أهم الأهداف اللى نفسك تحققها العام ده،

على المستوى العملى و الشخصى و الاجتماعى و الدينى..

و تفكر ازاى تملا وقتك بالاعمال اللى توصلك للاهداف ده،

و واعى ازاى تخلى كل يوم خطوة ايجابية فى طريق تحقيق أهدافك

عشان كده الشاعر و الفيلسوف الألمانى جوته بيقول:

 

"لا يجب ان تكون الأمور الأكثر أهمية، تحت رحمة الأمور الأقل أهمية".

Sunday's Vitamin: The 100 pounds paper!

دخل الاستاذ على تلاميذه فى الفصل، و أخرج لهم ورقة ب100 جنيه، و سألهم من منكم يريد هذه الورقة الصغيرة؟!

طبعا رفع الجميع أيديهم بأنهم يريدونها...

قام الأستاذ بوضع الورقة فى كوب من الماء، ثم كرر سؤاله على تلاميذه، من منكم ما زال يريد هذه الورقة الصغيرة المبللة؟!

لم يغير التلاميذ آراءهم، فرفعوا أيديهم مرة أخرى...

هذه المرة، أخذ الأستاذ الورقة المبللة و لوثها ببعض الرمال خارج الفصل، ثم عاد و كرر سؤاله عن من يريد الورقة الصغيرة المبللة المتسخة؟

لم يزل التلاميذ على رأيهم، و رفعوا أيديهم للمرة الثالثة...

لماذا؟!!

لأن قيمة الورقة فيها مهما حدث لها...

و أنت أيضا كذلك

أنت عالى القيمة، كرمك الله، و علمك ما لم تكن تعلم،

و أعطاك من القدرات و المواهب ما يميزك عن غيرك من البشر

مهما حدث لك...

مهما آذاك من حولك...

مهما أرهقتك الظروف...

مهما فشلت فى الماضى...

لا زالت قيمتك فيك

لا زلت عالى القيمة

واياك أن تفقد ايمانك بنفسك و قيمتك و قدراتك

بسم الله الرحمن الرحيم

" ولا تهنوا ولا تحزنوا وأنتم الأعلون إن كنتم مؤمنين"

صدق الله العظيم

Sunday's Vitamin: An update for you too!

من كام يوم لاقيت الموبايل بيعمل تحديث “update” للأنرويد اللى عليه

و الحقيقة، موبايلاتنا "شاطرة" فعلا فى تحديث و تطوير نفسها باستمرار

عشان تواكب تطورات التكنولوجيا فى العالم

سؤالنا النهاردة، امتى آخر مرة عملت لنفسك "update"

عشان تتعامل و تنجح فى وسط الظروف اللى حواليك

امتى آخر مرة قررت انك تطور نظرتك للحياة، تبدل عاداتك، تنمى مهارات جديدة، أو تتعلم حاجة معينة؟

بشكل عام، و مع تعاملاتنا اليومية فى الحياة، كل واحد فينا كل يوم بيدرب أو بيطور مهاراته و أفكاره.

لكن، فى بعض الظروف أو أمام بعض التحديات لازم الواحد يعمل "update" متعمد لنفسه ينقله نقلة كبيرة و يساعده على النجاح فى حياته الشخصية أو العملية أو الدينية.

يبقى طلبى منك الأسبوع ده انك تحدد بوضوح

أهم العادات أو المهارات أو الأفكار أو العلاقات

اللى انت محتاج تغيرها أو تنميها عشان حياتك تبقى أحسن

حدد الامور ده بدقة، و حدد ازاى ممكن تعمل لها تحديث الفترة الجاية، و افتكر دايما ان:

بسم الله الرحمن الرحيم

"ان الله لا يغير ما بقوم حتى يغيروا ما بأنفسهم"

صدق الله العظيم