Sunday's Vitamin: SAVE ur DIAMONDs!

ربنا أعطى لك حاجات كتير غالية عليك...

مواهب... و خبرات... و علم...

علاقات... و أسرة... و أصدقاء...

صحة... و وظيفة... و فلوس...

وقت... و عمر ... و حياة...

و أنا و انت مسئولين نحافظ على الجواهر ده، و نحسن استخدامها علشان:

- نعيش بإذن الله حياة طيبة و ناجحة فى الدنيا.

- نحسن فى الدنيا و نكون أهل للجنة فى الآخرة.

علشان كده النبى صلى الله عليه و سلم قال:

"لا تزولُ قَدَمَا عبدٍ يومَ القيامةِ حتَّى يُسألَ عن أربعٍ

عن عُمُرِه فيما أفناهُ

وعن جسدِهِ فيما أبلاهُ

وعن علمِهِ ماذا عَمِلَ فيهِ

وعن مالِهِ مِنْ أَيْنَ اكْتَسَبَهُ وفيما أنفقَهُ"

و اسمع القصة الرمزية البسيطة ده من بسمة أمل لعمرو خالد:

Sunday's Vitamin: SINCE...,THEREFORE...!

الأسبوع ده عندنا 4 أفكار بسيطة

أسباب بتؤدى لنتائج

اعمل واحدة تكسب التانية

الأشخاص السعداء بيخلقوا بيئة عمل سعيدة و بيكونوا قادة سعداء.... يبقى اهتم بسعادتك و معنوايتك!

الحب دواء ممتاز للخوف و القلق... يبقى دور على حاجة تحبها (شغل أو شخص أو هواية).

ربنا ما خلقش حد زيادة... يبقى أكيد ليك دور مهم فى الحياة، دور عليه و اعرفه.

النجاح و التميز طويل الأمد هو نتيجة للمواظبة على ممارسات يومية سليمة... يبقى اتوصى بعاداتك و روتينك اليومى.

Sunday's Vitamin: WHO takes your DECISIONS?!

اتكلمنا الاسبوع اللى فات عن 2 من أهم العوامل اللى بتصعب علينا اتخاذ القرارات، و ازاى نتعامل معاها...

الأسبوع ده بنتكلم عن أعضاء لجنة اتخاذ القرار!

الجوانب النفسية جوه كل واحد فينا، اللى "بتتخانق" مع بعضها لحد ما توصل لاختيار نهائى

لأنك كل ما عرفت الجوانب ده و فهمت طبايعها، كل ما قدرت، بإذن الله، توفق ما بينها و توصل للقرار السليم

1- الأفكار:

مصدرها هو كل العلم و الخبرات اللى اكتسبتها... كل التجارب اللى مريت بيها و الاحداث اللى حصلت حواليك... و مرتبطة بموضوع القرار...

عضو مهم فى لجنة اتخاذ القرار، بس لازم تتأكد ان أفكارك مش "مخلوطة" بانطباعات أو استنتاجات أو افتراضات مش سليمة...

و اجتهد انك تكمل المعلومات الناقصة عندك و تتأكد من مصادرها...

2- المشاعر:

ناس كتير بتكبت مشاعرها، و تمشى كلام العقل عليها...

لكن المشاعر عنصر خطير و ليه دور مش بس فى اتخاذ القرار، و لكن كمان فى رضاك عنه، و سعادتك باللى هيحصل بعده...

و ايه الفايدة من قرار سليم "منطقيا" بس تعيس "عاطفيا"؟!

المهم أنى اتجنب المشاعر المؤقتة اللى ممكن "تبوظ" اختياراتى، فأرجع أندم بعدها...

زى "الغضب"، أو "الحماس الوقتى" لفكرة معينة... و زى "الخوف" الغير مبرر...

3- النفس:

النفس هى مصدر الاحتياجات و الرغبات... هى مركز الارادة و الصبر...

و هى كمان منبع الغيرة و التفاخر و الاستعجال...

النفس ليها حضور طاغى على لجنة اتخاذ القرار.. بس انت برضه تقدر تروضها و تنقيها من الرغبات و العوامل اللى ممكن تضر باختيارك و قرارك.

النفس زى العربية الكبيرة فى اندفاعها و قوتها... بس فى النهاية انت اللى فى ايدك قيادتها و فرملتها...

بسم الله الرحمن الرحيم

"قد أفلح من زكاها و قد خاب من دساها"

صدق الله العظيم

4- القيم و المبادئ:

كل واحد فينا عنده منظومة القيم الخاصة بيه... حسب دينه... اخلاقه... مبادئه... و رسالته فى الحياة...

اما تهمل جانب القيم فى عملية اتخاذ القرار... مين اللى بيتعب؟؟

صح... الضمير... و كلنا مجربين تعب الضمير!!

المهم هنا... انى فعلا اكون عارف اهم القيم عندى... و حسب طبيعة القرار، احدد ترتيب الاولويات بين القيم و بعضها...

لأن مع اختلاف المواقف... بيتغير ترتيب القيم و اهميتها...

مثلا...

العدل قيمة مهمة، بس فى بعض المواقف ممكن قيمة العفو او الرحمة تسبقه...

-------------------------------

فى النهاية... اذا كان الأربعة دول هم لجنة اتخاذ القرار

فأوعى تنسى انك المدير... انك صاحب الكلمة الاخيرة

و الوحيد اللى فى ايده، بإذن الله، يستفيد أو يتجنب الضرر من كل عضو فى اللجنة