Sunday's Vitamin: About Leadership (1)

قرأت من فترة كتاب فى القيادة، مؤلفته استرالية قادت حملة بحثية لمدة سنة فى القارة القطبية الجنوبية...

اتعلمت منه عدد من الأفكار اللى ممكن تفيد أى حد فينا نفسه يبقى مدير، أو مديرحاليا و عاوز يكبر فى المناصب فى المستقبل...

على مدى ثلاث أسابيع ان شاء الله، هنتكلم كل مرة عن فكرتين مهمتين من الكتاب...

1- اتعلم القيادة و درب نفسك عليها من النهاردة:

- ابعد عن منطقة الراحة "comfort zone" بمعنى الأعمال اللى انت متعود عليها و الأشخاص اللى انت عارفهم كويس.

يعنى جرب طرق و أفكار جديدة فى العمل، و ما تخافش انك تشتغل مع ناس ما تعرفهاش.

- اعمل مخاطرات محسوبة و اتعلم منها (حتى لو فشلت).

- اتطوع فى مشاريع جديدة، ارمى نفسك فى تحديات مختلفة، هتتعلم و خبرتك العملية و الانسانية هتزيد باذن الله بسرعة.

- اقرأ و طور نفسك فى المواضيع المتعلقة بالقيادة و الادارة.

2- آمن بنفسك، و كن على طبيعتك:

- الناس مش هتقتنع وتقبل قيادتك لو انت أصلا مش مقتنع و مؤمن بنفسك.

- افهم شخصيتك، و اعرف نقط القوة و التميز فيك (اللى أكيد موجودة و كتيرة)، و استخدمها عشان تنجح.

- اعرف كويس ان مافيش قائد بدون نقط ضعف، و بالتالى افهم نقط ضعفك، و اعترف بيها بينك و بين نفسك، و فكر ازاى تصلحها أو تعوضعها بنقاط القوة اللى عندك.

- القائد مش لازم يبقى فاهم و ماهر فى كل حاجة فريقه بيعملها، ده مش عيب، بس على الأقل خليك عارف تجيب المعلومة الصح منين أو من مين.

Sunday's Vitamin: Nadman?!!

ندمان على حاجات عملتها فى الماضى؟

عندك أخطاء ارتكبتها فى حياتك العملية أو الشخصية و شايف انك بتدفع تمنها دلوقتى؟

حاسس ان فشلك زمان مأثر عليك لحد النهاردة؟

شايف ان مستقبلك هيتأثر بقرارات غلط أخدتها قبل كده؟

 

سيبك من كل ده

و اعرف ان طالما لسة فى عمرك بـقية

يــبــقى أيــا كانــت ســــنـك أو ظـــروفــك أو مـــوقــعــك

فـــرصـــــك مــــازالـــــت موجــــــودة

و ربنا بإيـده يــصلح لك طريــقك و يهيـألك فـرص جـديدة

طــول ما عنـدك النيــة انــك تـحاول و تــجتـهد و تـنــجح

 

 

و اسمع القصة القصيرة ده، من محاضر الادارة الامريكى دارين هاردى،عن نجاح واحد كلنا عارفينه، بعد سنوات طويلة من الظروف الصعبة و الفشل المتكرر:

Sunday's Vitamin: What was ENOUGH is no more ENOUGH!

كام ايميل بيجيلك كل يوم؟

كام بوست بيظهر لك على الفيس أو الواتس؟

كام اعلان بتشوفه و كام منتج بيحاول يشد انتباهك؟

كام واحد بتقابله أو بيطلب منك حاجة كل يوم؟

 كام طلب أو تقرير بتقدمه لمديرك؟

 و لو انت مدير، كام حاجة بتطلبها من موظفيك كل يوم؟

تفتكر فى وسط الزحام ده كله،

مين اللى بنفتكره أكتر؟

مين اللى بيعلم فى شغله و مع مديره أكتر؟

مين اللى بيأثر فيك أكتر؟

البوست العادى... و لا البوست اللى بيحرك حاجة جواك؟

الإعلان التقليدى... و لا الى بيقدم فكرة جديدة؟

 الى بيسلم عليك سلام روتينى... و لا الى مهتم بيك و بأحوالك؟

الى بيقدم عمل تقليدى... و لا الى بيبتكر كل يوم فى عمله؟

الى بيعمل الى عليه و خلاص... و لا الى "بيتوصى" اكتر و يحط لمسته الشخصية؟

عاوز تتميز و تعلم مع الناس؟

نفسك الى حواليك يفتكروك و يعرفوا شغلك؟

لازم اكتر، لازم تجدد،

لازم تحط لمستك الشخصية و تبتكر فى الى إنت بتعمله و تقدمه للناس

كل يوم

Sunday's Vitamin: Osbor showayyah!!

شوفت قبل كده طفل صغير متأخر فى الكلام؟

شوفت ازاى أهله بيكلموه و يعلموه لشهور طويلة من غير ما ينطق؟!

طيب شوفت أما مرة واحدة، و بعد صبر طويل، اتكلم "لبلب" كأنه بيتكلم من زمان؟!

ده اسمه "التأثير المركب" أو "Compound Effect"

انك تبذل مجهود فى مجال معين لفترة طويلة بدون أثر..

و بعد صبر و اصرار، تظهر مرة واحدة أفضل النتايج اللى انت مستنيها..

طيب ايه فايدة الكلام ده دلوقتى؟!

عشان نفتكر أنا و أنت كام مرة:

لعبنا رياضة أو اشتركنا فى جيم، لكام يوم أو كام أسبوع، و أما ما ظهرتش النتايج بسرعة بطلنا..

ظبطنا أكلنا و مشينا على ريجيم صحى، و أما وزننا ما قلش، زهقنا و رجعنا لنظامنا القديم..

قرأنا فى مجال معين يفيد شغلنا، و أما حسينا ان ما فيش فرق واضح، و قفنا قراءة و قلنا الموضوع مش جايب همه..

حاولنا نواظب على عبادة معينة، و أما ما حسيناش بأثر روحى أو نفسى، رجعنا تانى زى الأول..

فى كل المرات ده، لو كنا صبرنا شوية كمان،

كنا شوفنا "التأثير المركب" و أخدنا أحسن النتايج اللى كنا بندور عليها..

يبقى ببساطة كده، حدد أهم أهدافك للعام ده، و حدد الأفعال أو العادات اللى لو واظبت عليها، توصلك باذن الله لأهدافك..

و قرر.. انك تصبر لحد ما تشوف "التأثير المركب" اللى نفسك فيه..

و افتكر الآية الجميلة:

بسم الله الرحمن الرحيم

يأيها الذين آمنوا

اصبروا وصابروا ورابطوا

واتقوا الله لعلكم

تــفـــلـــحـــــــون

صدق الله العظيم