Sunday's Vitamin: Happy 2016 & 2017 :)

"ما كانش فيها حاجة حلوة"

"سنة صعبة"

"أخيرا عدت"

و كلام كتير زى ده الناس بتقوله عن 2016...

بس الحقيقة ان ده سنة كاملة عدت من عمرك... 366 يوم و راحوا من حياتك...

لو عانيت فيها من مشاكل أو آلام...

أكيد في قصادها انجازات عملتها، و نعم ربنا فتح عليك بيها...

و فى حكمة جميلة بتقول:

"ما تركز عليه ينمو، ما تفكر به يتمدد، و ما تتعمق فيه يحدد مصيرك (بإذن الله)"

عشان كده انا عاوزك تفكر بشكل مختلف عن كتير من الناس... و بدل ما تركز على السلبيات، ركز و فكر نفسك بايجابيات 2016...

على المستوى الروحى:

علاقتك بربنا، مواظبة على عبادات معينة، رضاك عن نفسك، رسالتك فى الحياة، الخير اللى قدمته للناس؟

على المستوى الاجتماعى:

علاقتك بأسرتك، أصدقاءك، زمايلك، .....؟

أيام أو فسح حلوة فاكرها من السنة الى فاتت؟

على المستوى العقلى و العملى:

كتب حلوة قرأتها، دراسة و خلصتها، شهادة حصلت عليها، نجاحات فى العمل، ترقية، مهارات جديدة اكتسبتها؟

على المستوى المادى:

فلوس و حوشتها، حاجات قيمة اشتريتها، زيادة فى المرتب، شفاء من مرض، تحسن فى الصحة؟

بسم الله الرحمن الرحيم

"و أما بنعمة ربك فحدث"

صدق الله العظيم

يبقى على الأقل نحدث و نفكر نفسنا بنعمه علينا...

كل عام و انت بخير

سنة سعيدة عدت

و سنة جاية أجمل و أنجح بإذن الله

Sunday's Vitamin: How would u fill ur JAR?!

الأسبوع الى فات اتكلمنا عن الإنجازات الكبيرة اللى ممكن تعملها فى أيامك و أسابيعك...

و ضربنا مثل بفندق صينى، 30 دور، اتبنى فى 15 يوم!

رابط جرعة الأسبوع الى فات 

المرة ده هنوضح ان السر فى انجاز أعمال عظيمة فى وقت قليل هو إنك:

- تحدد أهم الأعمال الى هتفرق معاك و الضرورية لتحقيق انجازاتك (أولوياتك يعنى).

- تملا بيها وقتك و أيامك، قبل أى حاجة تانية أقل فى الأهمية (الشواغل).

و اتفرج على الفيديو البسيط ده، عشان يوضح و يجسد المعنى:

(مع اعتراضى على آخر جملتين فيه!)

قول لى بقى، عارف أولوياتك و لا لسة؟!!

Sunday's Vitamin: What did u do last week?!

سؤال بسيط و واضح...

إيه أهم انجاز عملته الأسبوعين الى فاتوا؟!

بلاش أسبوعين... خليها الشهر الى فات؟

أهم انجاز فى العمل أو الدراسة أو مع الأسرة أو فى علاقتك بربنا؟

فكر كويس... و إن شاء الله هتلاقى انجازات طيبة فى الفترة ده...

بس لو مالاقتش، اتفرج على الفيديو ده... عشان نفكر بعض بقيمة الوقت... و الحاجات الكبيرة الى ممكن ننجزها فى أيامنا و أسابيعنا...

ده فيديو عن فندق صينى، 30 دور بتكنولوجيا و تصميم حديث، اتبنى فى 15 يوم!!

قول لى بقى... ناوى تعمل إيه الأسبوعين الى جايين؟!!

Sunday's Vitamin: Sacrifice for your talents!!

كل واحد فينا ربنا أعطى له مجموعة من المواهب و الملكات عشان يكبر و يتطور فى الدنيا...

و حسن استخدامك لمواهبك من أكتر الحاجات اللى ممكن تخليك ناجح و سعيد فى حياتك العملية و الاجتماعية... و فى علاقتك مع ربنا كمان...

الموهبة كنز "ربنا وهبه لك"، و دروك انك:

- تكتشفه.

- تحافظ عليه و تنميه.

- تستخدمه، و تفيد بيه نفسك و الناس من حواليك.

حاجة كمان مطلوبة منك... التضحية!!

التضحية ازاى يعنى؟؟!

اسمع الحلقة ده من "بسمة أمل" لعمرو خالد:

Sunday's Vitamin: Only the dead fish do this!!

تخيل انك بتتمرن عشان تبنى عضلاتك... بس ما بترفعش غير الأوزان السهلة عليك... تفتكر التمرين هيجيب فايدة؟!

تخيلى انك نويتى تعملى ريجيم... بس بتاكلى كل اللى بيتقدم ليكى أو بييجى على هواكى... تفتكرى هيكون فيه فايدة؟!

ده طبيعة للحياة

النتايج الحلوة بتيجى مع التعب و الصبر

الحياة سلاسل من الاختبارات... و هى فرصة عشان نقوى عضلاتنا فيها... عشان نكبر.... عشان نتعلم و نطور من نفسنا...

لو سيبت نفسك لتيارات الحياة... بدون هدف... بدون مقاومة ... بدون اعادة توجيه... هتكون النتايج فى نهاية مشوارك متواضعة.... عادية...

السمك الميت بس هو اللى دايما ماشى مع التيار... اما أقوى الأسماك... فهى اللى بتسبح ضد التيار... و لها وجهة و اصرار رغم اللى بتواجهه من مقاومة و أمواج...

يعنى ببساطة...

لو عاوز يبقى ليك اثر...

لو نفسك تكون ليكى بصمة فى الحياة...

لو بتدور على انجازات الناس تفتكرها سنين من بعدك...

 ما فيش قدامك اختيار... غير انك، بعد ما تحدد وجهتك و أهدافك، تقاوم و تعوم ضد الظروف اللى واقفة قصادك...

الحاجة الجميلة... انك مش لوحدك... طالما فى الخير... ربنا اكيد هيكون معاك... يهديك و يقويك...

و يوم عن يوم هتكون يإذن الله أقوى... و أكثر قدرة على السباحة و الوصول لأهدافك

Sunday's Vitamin: 10 more life little instructions!

اتكلمنا المرة اللى فاتت عن عشر نصايح من كتاب لطيف اسمه " Life's Little Instruction Book"...

كتبه مؤلف أمريكى اسمه "جاكسون براون" " Jackson Brown"...

عبارة عن نصايح قدمها لإبنه فى اول سنة له فى الجامعة... و كتير منها مفيد فعلا...

 

الأسبوع ده هنتكلم بإذن الله عن 10 كمان

11- اقلب أعداءك لأصدقاء بفعل شيء جميل ومفاجئ لهم!

12- حين تدق الفرصة على بابك أدعوها للمبيت!

13- لا تتجاهل الشيطان مهما بدل ثيابه.

14- لا تكن منشغلا لدرجة عدم التعرف على أشخاص جدد.

15- اعط الناس أكثر مما يتوقعون!

16- لا تهدد ما لم تملك القدرة على التنفيذ!

17- تعلم الاسعافات الأولية فجميعنا يمر بظروف قد يندم عليها!!

18- اقض مع أطفالك ضعف وقتك المعتاد وامنحهم نصف المال المعتاد!

19- لا تتوقع من أطفالك الاستماع لنصائحك ووضعك مزر!

20- لا تحرم الآخرين من الأمل فقد يكون هذا كل ما يملكونه.

Sunday's Vitamin: Life little instructions book!

كتاب لطيف سمعت عنه قريب " Life's Little Instruction Book"...

كتبه مؤلف أمريكى اسمه "جاكسون براون" " Jackson Brown"...

عبارة عن نصايح قدمها لإبنه فى اول سنة له فى الجامعة...

كتير منها جميل و مفيد فعلا...

ممكن تحمله و تقرأه من هنا...

الأسبوع ده و اللى جاى بإذن الله هنتكلم عن 20 منهم

1- اعتن بسمعتك جيدا فستثبت لك الأيام أنها أغلى ما تملك.

2- لا تخش العقبات الكبيرة فخلفها تقع الفرص العظيمة.

3- ركز على جعل الأشياء أفضل وليس أكبر أو أعظم.

4- كلما تعلمت أكثر كلما طرحت عن كاهلك المزيد من المخاوف.

5- تعلم كيف تستمع... فالفرص الخفية تحتاج لأذن قوية.

6- اكتب 10 اشياء تريد انجازها في حياتك ثم ضع الورقة في محفظتك. 

7- كل شخص تقابله يملك شيئا مميزا، حاول تعلمه.

8- لا تشارك رجلا فشل ثلاث مرات.

9- لا تتخذ قرارا وأنت غاضب.

10- كن سعيدا بما تملك، وأعمل لامتلاك ما تريد.

Sunday's Vitamin: 3 more SHIFT - DELETE!!

اتكلمنا الاسبوع اللى فات... إن إذا كنت عاوز تبقى "Game Changer" فى شركتك أو مجالك أو بلدك...

يبقى لازم تعمل "ست تحولات" أو "6 shifts" فى نظرتك و طريقة تعاملك مع تحديات الحياة...

أول تلات تحولات كانوا: 

الأسبوع ده هنتكلم عن التلاتة الباقيين:

4- Shift from PAST to FUTURE

من الماضى الى المستقبل

التحول من التفكير الكتير فى الماضى و ذكرياته... و الندم عليه أو الهروب المستمر اليه...

الى النظر للمستقبل و التخطيط و الاستعداد ليه... و التفاؤل بيه بإذن الله...

 

(حكمة و ليست حديث)

5- Shift from WEEKS to GENERATIONS

من الأسابيع الى الأجيال!!

فيه ناس كل همها إن ساعات العمل تخلص عشان تروح... أو مهمومة بمشاكل اليوم و بتبص "تحت رجلها"...

و ناس دايما مستعجلة على يوم الخميس و اجازة نهاية الأسبوع...

ناس تانية نظرتها أبعد شوية... عاوزة شغلها و أثرها يستمر لسنين و أجيال قدام... مهمومة بتحقيق أهداف و انجازات فى المستقبل البعيد...

 

6- Shift from DREAMS to GOALS

من الأحلام الى الأهداف

التحول من الأحلام و الأمنيات المرسلة...

الى الأهداف المحددة، اللى لها خطوات و إطار زمنى...

Sunday's Vitamin: SHIFT- DELETE!!

عاوز تبقى "Game Changer" فى المكان اللى انت فيه؟!

نفسك يبقى ليك دور بارز فى نجاح شركتك؟

بتفكر ازاى تعمل انجاز واضح فى مجالك أو بلدك؟

لو إجاباتك "نعم"، يبقى إعرف معانا الأسبوعين دول  "ست تحولات" "6 SHIFTS" محتاجين نعملهم فى طريقة تفكيرنا و تعاملنا مع تحديات الحياة...

الأسبوع ده هنتكلم عن أول 3 SHIFTS:

1- Shift from EXCUSES to EXECUTION

من الأعذار الى التنفيذ

التحول من التفكير فى الأعذار و التحجج بظروف و صعوبات الحياة، و من الشكوى من الناس اللى حواليك...

الى التركيز على أعمالك و ازاى هتنفذها مهما كانت التحديات، و أحلامك و ازاى هتوصلها مهما كانت بعيدة...

و افتكر قصة سيدنا يسوف

اللى ولا مرة اشتكى من ظلم اخواته أو قسوة الحياة عليه، و قال بعد ما وصل لإدارة البلاد:

"إنه من يتق و يصبر فإن الله لا يضيع أجر المحسنين"

صدق الله العظيم 

2- Shift from DISTRACTION to FOCUS

من التشتت الى التركيز

التحول من اضاعة الوقت فى مشاغل متفرقة و مواضيع قليلة الاهمية و "شات" و أخبار و "توك شو" ...

الى التركيز على أهم و أغلى أهدافك و مسئولياتك، و ملء وقتك باللى هيوصلك ليها بإذن الله...

و على رأى عالم الإدارة الامريكى "بيتر دراكر":

"الوقت هو أكثر الموارد ندرة، و اذا لم تحسن ادارته، فلن تسطيع ادارة باقى الأمور"

3- Shift from STAGNATION to OPTIMIZATION

من الركود و الروتين الى التغير و التطور

التحول من الروتين التقليدى اليومى، و الغرق فى مشاغل الحياة، و قصر النظر عن المستقبل ...

الى كسر الروتين، و إضافة أنشطة لحياتك اليومية تساعدك على التطور و التقدم، زى القراءة فى مواضيع مفيدة لأهدافك، دراسة أو حضور دورة فى مجالك، الاهتمام و الود مع أفراد أسرتك، الاشتراك فى "جيم"، الفسحة و السفر، ... 

فكر كويس فى التلاتة SHIFTS دول، و استنى معانا التلاتة الباقيين الأسبوع الجاى بإذن الله...