Sunday's Vitamin: Just to enjoy!

فكرة بسيطة و مجربة، و هتحسن، باذن الله، معنوياتك و مزاجك الاسبوع ده

هات ورقة و قلم، و اكتب لستة بسيطة بالحاجات اللى بتبسطك و اللى بتحب تعملها

ممكن:

مكان تروحه...

صحبة مع شخص معين...

أكلة حلوة...

رياضة معينة...

موضوع تقرأ فيه...

حاجة تتفرج عليها...

نشاط معين فى شغلك...

عبادة بتحبها...

فكر كويس و جمع النقاط ده

و قرر انك تعمل أكبر عدد منها الأسابيع اللى جاية

صدقنى هتفرق معاك

بس أوعى تنسى ان الفرحة و السعادة، فى الأول و الآخر، بتوفيق ربنا و بفضله...

بسم الله الرحمن الرحيم

"قل بفضل الله و برحمته، فبذلك فاليفرحوا، هو خير مما يجمعون"

صدق الله العظيم

Sunday's Vitamin: Find the GOOD!

لو قلت لك دور حواليك دلوقتى عن أى حاجة لونها أحمر

هتلاقى

طيب دور على حاجة لونها أزرق

برضه هتلاقى

المرة ده دور على الأخضر

ان شاء الله هتلاقى

طيب ايه المقصود؟!

المقصود ان اللى بتدور عليه بتلاقيه

و اللى بتركز فيه بيملا تفكيرك و حياتك

يبقى كلمتنا الأسبوع ده:

ان طالما الحياة فيها أفراح و أحزان

مواقف سهلة و مواقف صعبة

ناس حلوة و ناس وحشة

نجاح و فشل

و أنت نفسك، فيك ميزات و عيوب

يبقى كل ما ركزت على الحاجات اللى بتضايقك

كل ما نظرتك للدنيا و للناس و لنفسك بقت سيئة و معنوياتك انخفضت

و كل ما دورت و ركزت تفكيرك على الحاجات الحلوة

وحمدت ربنا عليها من قلبك

كل ما نظرتك للدنيا و للناس و للظروف بقت أحسن، و بقيت راضى أكتر عن نفسك

و حسيت ان نعم ربنا حواليك من كل ناحية

و اسمع برضه القصة الجميلة ده من بسمة أمل لعمرو خالد:

جرب النصيحة ده الأسبوع ده و احكم بنفسك على النتيجة

Sunday's Vitamin: Do the EASY things!

النفس البشرية مجبولة على حب الحاجات السهلة...

على الراحة...

على تجنب التعب و الألم...

عشان كده أنا مش قادر أضبط أكلى...

مكسل أبدأ مشروع مهم و صعب فى شغلى...

مش عارف أنظم وقتى...

مستتقل المذاكرة مع ان الامتحان قرب...

مش قادر أقوم أصلى الفجر...

مش عارف أبطل سجاير...

و الرسول عليه الصلاة و السلام أكد على المعنى ده أما قال:

"حُفَّتِ الْجَنَّةُ بِالْمَكَارِهِ، وَحُفَّتِ النَّارُ بِالشَّهَوَاتِ".

طيب... أنا هقول لنفسى و أقول لك النهاردة... 

يعنى ايه؟!

أما تلاقى نفسك مش قادر تعمل الصح، بص على الموضوع نظرة من بعيد،

بص على النتايج اللى هتوصل ليها لو فضلت بعيد عن الاختيارات السليمة

و اسأل نفسك، ايه أسهل؟!

أظبط أكلى أو أبطل سجاير... و لا صحتى يحصلها كذا و كذا؟

أبدأ الشغل الصعب من دلوقتى... و لا أفشل و أسمع كلمتين بايخين من مديرى؟

أذاكر من النهاردة... و لا أتعب و أسهر و أتبهدل فى اليومين اللى قبل الامتحان؟

أقوم أصلى الفجر فى وقته... و لا أتعرض لغضب ربنا؟

أوعى تنسى، المرة الجاية، أما تتعرض لاختيار صعب زى ده، اسأل نفسك

ايه أسهل؟!

Sunday's Vitamin: Don't wish it was easier!!

لو قابلت مواقف صعبة الأسبوع ده...

شغل صعب، مشاكل مع مديرك، أعمال تقيلة، عملاء متعبين، هدف بعيد، ...

أو حتى مشاكل أسرية أو اجتماعية...

بدل ما تقول: "امتى الدنيا تبقى أسهل" أو "نفسى الشغل يبقى أبسط".

قول:المرة الجاية لازم أبقى "أحسن"، "أذكى"، "أمهر"، "مستعد اكتر"، "مذاكر أحسن".

و حط دايما فى عقلك، ان أى تحديات أو صعاب بتواجهك فى الحياة، ربنا أعطاك معاها قدرات و مهارات عشان تعرف تواجهها و تبقى أدها...

مهمتك بس فى انك تطلع و تنمى القدرات ده، و تحسن استخدامها...

طيب ايه الدليل؟!

بسم الله الرحم الرحيم

(لاَ يُكَلِّفُ اللّهُ نَفْساً إِلاَّ وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ)

و فى موضع آخر

(لَا يُكَلِّفُ اللَّهُ نَفْسًا إِلَّا مَا آتَاهَا ۚ سَيَجْعَلُ اللَّهُ بَعْدَ عُسْرٍ يُسْرًا)

صدق الله العظيم

Sunday's Vitamin: If you want MORE... be MORE!

لو عاوز نجاح أكتر، انجازات أكبر، علاقات أحسن

لو عاوز ثراء مادى أو روحى ...

لازم تكون أفضل، لازم تبقى أحسن

لازم تتطور، لازم تغيير السلبيات اللى فيك ...

و اعرف دايما ان التغيير بيبدأ من جواك،

و بناء على التغيير ده، كل حاجة حواليك ممكن، باذن لله، تتغير...

بسم الله الرحم الرحيم

(ان الله لا يغير ما بقوم حتى يغيروا ما بأنفسهم)

صدق الله العظيم

هتقول لى: "طيب ما أنا ممكن أتغير بس الظروف تمنعنى من الوصول للى أنا عاوزه؟!"

الرد فى كلمتين...

بسم الله الرحم الرحيم

(و من يرد ثواب الدنيا نؤته منها و من يرد ثواب الآخرة نؤته منها وسنجزي الشاكرين)

صدق الله العظيم

ياللا ما تضيعش وقت، و فكر ازاى هتغير نفسك للأفضل

Sunday's Vitamin: 2 years of Vitamins, please accept my simple gift!

كل عام و انت بخير بمناسبة عيد الأضحى المبارك

مع كل تمنياتى لك بالتوفيق و النجاح و السعادة

  

اللطيف كذلك فى هذه الأيام هو مرور عامان على جرعات Sunday's Vitamins

عامان من التواصل و تبادل الآراء، أود أن أشكرك عليهما

و على اهتمامك المستمر لتطوير و تحفيز نفسك

 

و احب أن أستغل هذه الفرصة و أهدى لك هدية بسيطة و هى كتاب مسموع (Audiobook) بعنوان

Greatness Guide

مؤلف الكتاب هو الكاتب و الخبير العالمى فى الادارة، روبن شارما.

الكتاب عبارة عن فقرات بسيطة سريعة للتحفيز و التطوير، مع أمثلة واقعية كثيرة.

يمكنك أن تحمل الكتاب (ثلاثة أجزاء) من هذه الروابط:                                                                         

https://drive.google.com/file/d/0B7kUpuZBChhDWTNZN2ZkWDBkYVU/view?usp=sharing

https://drive.google.com/file/d/0B7kUpuZBChhDT2w0eVVkOXdSX2s/view?usp=sharing

https://drive.google.com/file/d/0B7kUpuZBChhDMmdrUlVzOHl5TTA/view?usp=sharing

(لا تقلق من تحذير جوجل عند التحميل، الملفات سليمة :) ).

الملفات بصيغة MP3، و بالتالى يمكنك الاستماع اليها على أنواع الاجهزة المختلفة، مستغلا أوقات المواصلات و فترات الانتظار.

و نراك على خير باذن الله فى العام الثالث من Sunday's Vitamins

Sunday's Vitamin: Wanna be world class?!

أحمد زويل و نجيب محفوظ، فازوا بجايزة نوبل فى ايه؟

ميسى موهوب عالمى فين؟

مايكل جوردان بطل فى أى مجال؟

بيل جيتس أو ستيف جوبز، متميزين فى ايه؟

كل واحد من المشاهير دول، و غيرهم، متميز فى مجال واحد و لا مجالات كتير؟ّ!

مشاهير و أبطال العالم، و الناس الأكثر نجاحا،

هتلاقى كل واحد منهم متميز فى مجال محدد أو فى عدد بسيط من المهارات

ركز عليها تفكيره، طلع فيها مواهبه، و بذل فيها وقته و جهده، لحد ما بقى عالمى فيها 

عشان كده طلبى منك الأسبوع ده انك تحدد انت عاوز تبقى عالمى في ايه...؟

دور أو مهارة معينة فى مجالك الوظيفى...

هواية أو رياضة معينة...

دور اجتماعى أو دينى أو أسرى...

حدد بدقة...

و قرر انك تركز معظم مجهودك و تطلع مواهبك فى الاتجاه و المجال ده...

و فى المقابل، لازم تحدد ايه اللى "هتكبر دماغك منه" و تبطل تضيع مجهودك و وقتك فيه...

حاجات قليلة الأهمية، برة حلمك و مش هتساعدك فى الوصول ليه...

Sunday's Vitamin: Big goal = small steps!

الأسبوع الماضى اتكلمنا عن الاختيار بين تعب الانضباط (discipline) و ألم الندم (regret)...

و ان انضباط الواحد فينا فى جوانب حياته المختلفة بيحميه باذن الله من الندم على الفشل فى هذه الجوانب.

النهارده هنوضح فكرة تانية مرتبطة بالانضباط، و هى:

أكبر النجاحات و أعظم الانجازات

ما هى الا خطوات منضبطة، واحدة ورا التانية حتى تحقيق الأهداف المطلوبة

عشان كده أنا الأسبوع ده هعمل حاجة...

هفكر فى هدف كان نفسى أوصل له من زمان، بس كنت مستكبر الفكرة و مستصعب الطريق ليها.

هدف كبير، مستبعد تحقيقه... فى حياتى الشخصية أو العملية أو الدينية.

بعد كده هفكر فى أول خطوة ممكن أخدها الأسبوع ده عشان أبدأ أتحرك فى اتجاه هدفى ...

خطوة واحدة بس الأسبوع ده...

لو نجحت معايه هيكون عندى أمل أكبر فى تحقيق هدفى، و ثقة أعلى فى قدرتى على الخطوة الجاية.

جرب معايه انت كمان و خد خطوة واحدة الأسبوع ده

و افتكر دايما ان:

Sunday's Vitamin: Regret vs. discipline!

الندم.. من أكتر الأحاسيس المؤلمة لأى واحد فينا

بس فى كتير من الأحيان، بيبقى عندنا فرصة مبكرة للاختيار ما بين ألم الندم و ألم الانضباط.

لأن فى معظم الأحيان، انضباط الواحد فينا فى حياته الصحية، العملية، ، الدراسية، الدينية أو الاجتماعية بيحميه من ندم الفشل فى هذه الجوانب.

يعنى ببساطة... فى معظم جوانب الحياة،

عليك دايما الاختيار ما بين ألم الانضباط و تعبه و بين ألم الندم بعد فوات الاوان

عشان كده هطلب منك الأسبوع ده انك تحدد أكتر سلوك بيسبب لك ندم متكرر...

هل هى حاجة بتأخر تنفيذها فى العمل؟

هل هو أكل غير صحى؟

هل تقصير فى علاقة اجتماعية؟

طريقة معينة فى التعامل مع الناس؟

تفريط فى العلاقة مع ربنا؟

حدد سلوك واحد بس و اختار الانضباط بدل الندم

قرر انك تمنع السلوك ده الأسبوع ده بس...

أسبوع واحد بس..

و شوف النتيجة

لو عجبتك هيبقى عندك حافز و قوة تكمل بيها بعد كده

و افتكر، ان أكبر ندم هو:

بسم الله الرحمن الرحيم

"أن تقول نفس ياحسرتا على ما فرطت في جنب الله وإن كنت لمن الساخرين،

أو تقول لو أن الله هداني لكنت من المتقين،

أو تقول حين ترى العذاب لو أن لي كرة فأكون من المحسنين".

صدق الله العظيم

Sunday's Vitamin: How can you complete the PUZZLE?!

تخيل تلاتة بيتنافسوا فى لعبة بازل (puzzle)

واحد معاه الصورة اللى هيجمع القطع زيها

واحد مش معاه الصورة

واحد معاه صورة غلط

مهما كانت سرعة التانى و التالت، تفتكر مين اللى هيكسب؟!!

طيب ليه؟

عشان لازم يبقى عندك تصور للمستقبل (vision) عشان تعرف تبنى عليه حياتك!

طيب يعنى ايه المطلوب بالضبط؟!

المطلوب منك، من النهاردة، تحدد أهم أهدافك لسنة قدام...

أهداف لحياتك العملية، الصحية، الاجتماعية، أو الروحية...

اكتبها...

تخيلها... لازم تتخيلها...

هتبقى حاسس بايه لو حققتها؟

حياتك هتبقى أحسن بأى شكل؟

هو ده بس المطلوب منك الأسبوع ده

انك تحدد الصورة اللى هتجمع عليها قطع حياتك الفترة الجاية