I Grow...

Welcome note

Dear colleague

We are proud to welcome you in I Grow training & marketing blog, in which you can find a series of courses in different managerial, marketing & soft skills areas.

You'd find on the main page, all the courses sorted by their date of delivery. In addition, you can find on the right hand column of the page, the main categories of the courses, through which you can access the topics you prefer.

We truly appreciate your visit, and thus all the courses are available for viewing & downloading.

With our best regards.

-----------------------------------------------------------------------------------------------------------------------------------------------------------------------------------

24 September, 2017

Sunday's Vitamin: My beginner's level!

كل عام هجرى جديد و انت طيب

عام سعيد و موفق بإذن الله

اتكلمنا الأسابيع اللى فاتت ان كل يوم و كل سنة هى فرصة لبداية جديدة... أحاول أغير فيها حياتى أو علاقاتى أو شغلى للأحسن...

فرصة آخد خط فى مجال مضايقنى فى حياتى... و ابدأ بشكل يرضينى و يسعدنى أكتر...

طيب... عندنا هنا سؤال محرج!

اخر مرة حاولت تغير سلوك أو عادة... أو بدأت عمل مختلف... أو مارست مهارة جديدة...

كان ايه مستواك؟ و كان ايه شعورك؟

هتكلم عن نفسى... بأكون فى البداية "تعبان"! J

تعبان فى المستوى... و تعبان نفسيا لأنى مش متعود أو خايف...

ده الطبيعى!

أى حد فينا بيبدأ يغير سلوكياته أو مهاراته أو علاقاته... بيتعب و يغلط فى البداية...

المشكلة انك توقف و تبطل تحاول أما تحس بالتعب ده...

تخيل طفل جرب يمشى... فأما لقى نفسه بيقع و يتخبط... بطل يحاول... مصيبة!!

مهما كانت كفاءتك عالية فى السلوكيات اللى انت متعود عليها... اعرف انك هتبدأ من مستوى أقل بكتير فى السلوكيات و المهارات و التعاملات الجديدة عليك...

بس مع الصبر و تكرار المحاولة... و عدم الزهق... واحدة واحدة هتوصل للكفاءة و المستوى اللى يرضيك...

فى النهاية و قبل ما تغير الصفحة... فكر فى حد تعرفه... شخصية عامة أو قريبة منك... بدأ فى مجاله من مستوى ضعيف جدا... لكن مع الوقت و الاصرار و المثابرة... بقى متميز و مشهود له بالكفاءة...

انت كمان ممكن تعمل زيه... و اكتر بإذن الله

17 September, 2017

Sunday's Vitamin: DRAW today!

اتكلمنا الأسبوع اللى فات ان كل يوم و كل أسبوع هو فرصة لبداية جديدة...

بداية أصلح فيها أى جانب فى حياتى أنا مش راضى عنه...

و كل بداية هى ورقة نظيفة و جديدة... تقدر تنسى اللى فات و ترسم فيها اللى انت عاوزه... بتغيير سلوكياتك، طريقة شغلك، عباداتك أو أسلوب تعاملك مع الناس اللى حواليك...

طيب فى واحد بيقول:

"فات الوقت خلاص"

"صعب أوى أغير حاجة بعد السنين ده كلها"

"أنا كده" أو "هما كده" أو "الدنيا كده"

و أنا هاقول له:

طالما "فيه نفس"، يبقى ربنا مديك الفرصة تصلح وتطور و تغير حياتك... و المجالات اللى انت مش سعيد فيها...

لو أتأخرت شوية... فالحل الوحيد انك تبدأ دلوقتى...

و على رأى كاتب الادارة الأمريكى "دارين هاردى":

"كل عمل عظيم، كل مغامرة رائعة، بدأت بخطوات صغيرة.

و دائما ما تبدو لك أول خطوة أصعب مما هى فعلا عليه"

طيب يعنى أعمل ايه بالظبط؟؟!!

حدد أكتر جانب انت مش راضى عنه فى حياتك... العمل أو العلاقات الأسرية أو علاقاتك بربنا أو صحتك و أكلك أو مالياتك... و حدد ايه اللى في ايدك تعمله من النهاردة عشان تبدأ تصلح الجانب ده...

و اعرف ان أى تغيير بسيط للأفضل، لو حافظت عليه، هيفرق معاك كتير باذن الله فى المستقبل...

و عشان تسهل على نفسك تحديد جوانب الرضا أو عدم الرضا فى حياتك...

اضغط على الرابط و جاوب على اختبار "عجلة الحياة" "Wheel of life"...

فى موقع الكاتب الأمريكى "تونى روبنز"...

10 September, 2017

Sunday's Vitamin: Your new starting line!

قضينا اجازة حلوة فى العيد و رجعنا تانى لحياتنا المعتادة

بس خلى رجوعك المرة ده مختلف، خليه بداية جديدة

ازاى يعنى؟!!

هسألك سؤال بسيط، هل انت عايش زى ما بتتمنى، فى كل جوانب حياتك؟

كان نفسك يكون شغلك أو علاقاتك الأسرية أو صحتك، أو علاقتك بربنا أحسن من كده؟

كان ليك تصور مستقبلى جميل لجانب معين فى حياتك، و انت بعيد عنه دلوقتى؟!

حصل خير...

أيا كان ماضيك... أيا كانت قصة حياتك...

فأنت عندك ورقة نظيفة و جديدة لبكرة... اكتب فيها اللى انت عاوزه...

انسى الرسمة القديمة... و ارسم رسمة جديدة تليق بيك...

لأن مستبقلك مش بالضرورة يكون زى ماضيك...

تقدر النهاردة تبدأ بداية جديدة... مختلفة... فى المجال اللى مضايقك فى حياتك...

تقدر من النهاردة تغير عاداتك و سلوكياتك، أو تتعامل بشكل مختلف علشان تصلح المجال ده... و تحصل على نتايج أحسن، ترضيك...

اسأل أى حد عمل انجاز كبير فى حياته، هتلاقى نقطة بداية معينة مر بيها... غيرت تفكيره أو ارادته أو قراراته... و خلته يبدأ مشواره بشكل مختلف و يسعى بقوة ورا أحلامه...

بعضهم عمل التغيير ده فى الصغر و بعضهم فى الكبر...

سواء فى شغلك، فى علاقاتك أو فى دينك...

و أيا كان عمرك... ابدأ التغيير ده النهاردة...

و الحكمة الجميلة بتقول:

ما من يوم ينشق فجره إلا وينادي يا ابن آدم أنا خلق جديد، وعلى عملك شهيد فتزود مني فإني لا أعود إلى يوم القيامة.

03 September, 2017

Sunday's Vitamin: HAPPY Eid.. GENIUS leadership :)

كل عيد أضحى و أنت طيب

و كل عام و انت بخير و نجاح و تقدم

و فيه مناسبة لطيفة تانية، هى مرور أربع سنوات على فيتامينات يوم الأحد

أربع سنوات من محاولاتنا، أنا و انت، نطور من نفسنا و من مهاراتنا فى مختلف مجالات الادارة...

علشان كده لازم يكون فيه هدية بسيطة لحضرتك (و ممكن نسميها عيدية J)...

محاضرة مسموعة بسيطة، 35 دقيقة، لكاتب الادارة الكندى روبن شارما اسمها

"10 مفاتيح للقيادة العبقرية"

“10 keys to genius level leadership”

مش بيتكلم فيها روبن عن حاجات تعملها...

و لكن عن أفكار... قناعات... تحطها فى دماغك علشان تبقى قائد متميز...

حملها و اسمعها فى الاجازة... فكر فيها كويس... و اديها فرصة تأثر فى سلوكياتك كقائد فى مجال العمل...

و مرة تانية... كل عام و انت حبايبك بخير

27 August, 2017

فيتامين يوم الأحد!

اختبار لذيذ و بسيط

تعرف بيه مدى رضاك عن مهنتك الحالية، و ملاءمتها ليك

(أقصد هنا المهنة أو مجال العمل (career)،

مش الوظيفة (job) اللى هى مرتبطة بشركتك و ظروفها و بالناس اللى بيشتغلوا معاك)

هسألك سؤالين فى الاختبار ده:

1- لو حطيت فى حسابك دلوقتى مليون دولار (يعنى 17 مليون جنيه L)، هتفضل تشتغل فى نفس المجال، و تكمل طريقك فى مهنتك، لأن قيمتها عندك أكبر من الفلوس؟ و لا ده هيكون آخر يوم تشتغل فيه؟!

2- هل كل شوية بتبص فى الساعة عشان تعرف معاد "المرواح" قرب و لا لسة؟ بتعد الساعات و الدقايق لحد نهاية يوم العمل؟ و لا مش فارقة معاك كتير، و مستعد تقعد، من نفسك، وقت زيادة عشان تكمل شغلك، لأنك مستمتع باللى بتعمله؟

اجابتك بأمانة على السؤالين دول هتديك رؤية تكمل فى مجال العمل ده على المدى الطويل، ولا لأ...

تصبر و تتعلم و تكبر، و لا تدور على مجال تانى يديك اجابات أحسن...

و على رأى ستيف جوبز (مؤسس أبل):

20 August, 2017

Sunday's Vitamin: Simple things excellent leaders do!

لو سألتك عن أهم صفات القادة الناجحين، فى عصرنا الحالى، هتقول لى ايه؟

رؤية.. هدف... تأثير... حماس... ثقة... و صفات تانية مهمة...

طيب، جنب الصفات المميزة ده، أنا عاوز النهاردة أكلمك عن سلوكيات بيمارسها القادة الناجحين، تقدر تطبقها بنفسك، و تقدر تقييم بيها القادة اللى حواليك...

1- التركيز على أولويات محددة... حسب طبيعة التحديات اللى بيواجهوها:

القائد الناجح مش بيشتت نفسه فى متابعة التفاصيل فى كل جوانب و أمور العمل..

و لكن بيحدد أولوياته فى كل مرحلة، و يركز عليها وقته و مجهوده، و يفوض بقية المهام الأقل الأهمية لمعاونيه...

2- التمكن و التميز فى "صنعتهم":

ناس كتير بتوصل للمستوى المتوسط المرضى فى مجال العمل، و "تمشى حالها" بيه...

القائد المتميز "ما بيشبعش" فى انه يطور نفسه و شغله... يتعلم و يجدد و يجرب...

3- تقدير العنصر البشرى:

القائد الناجح عارف ان الرؤية و الأهداف العظيمة تعتبر أوهام، من غير ناس عظيمة... متميزة... متحمسة...

بيهتم بعلاقاته الانسانية بأعضاء فريقه...

و بيبذل وقت و مجهود فى انه يطورهم و يرفع روحهم المعنوية... باستمرار... عشان ينجح معاهم فى تخطى التحديات اللى بيقابلوها فى طريق الوصول لأهدافهم...

--------------------------------

يالا... فكر بسرعة قبل ما تغير الصفحة

ايه اللى محتاج تطبقه من السلوكيات ده عشان تزود تميزك و نجاحك

06 August, 2017

Sunday's Vitamin: Enta ghany??!

انت غنى؟؟!

قبل ما تراجع حساباتك فى البنك عشان ترد، اعرف ان ثروتك الحقيقية بتتكون من 7 حسابات:

الحساب الأول؛ الثروة الروحية:

علاقتك بربنا...

رضاك عن حياتك بشكل عام...

راحة ضميرك...

التانى؛ الثروة الجسدية:

صحتك و لياقتك...

الثالث؛ الثروة الاجتماعية:

جودة علاقاتك بأهلك و أصدقاءك و زمايلك...

الرابع؛ الثروة المهنية:

نجاحك فى وظيفتك و رضاك عنها...

الخامس؛ الثروة الفكرية:

ثقافتك، شهاداتك، قراءاتك، معلوماتك...

السادس؛ ثروة التنوع:

التغيير و المغامرات اللى بتمر بيها فى حياتك...

التجارب الجديدة و التحديات المختلفة...

(ده بالمقارنة بحياة روتينية على نمط واحد).

السابع؛ الثروة المادية:

هى ده بقى فلوسك و حساباتك و أملاكك...

يالا... راجع حساباتك كلها... و رد عليا المرة ده...

انت غنى؟؟

بسم الله الرحمن الرحيم

(و ان تعدوا نعمة الله لا تحصوها)

صدق الله العظيم